Angelababy（楊穎）人紅得寵，昨日21歲生日，她由前晚開始20小時連走多場慶祝會。前晚與閨中姊妹到九龍城嘆糖水倒數，昨午扮學生妹與過百fans切蛋糕，到傍晚返家換衫後再出動，碰巧黃曉明昨日忽然來港，莫非二人有約？
得寵的Angelababy去年20歲生日，有張栢芝拍短片賀壽，昨日21歲生日，她在尖沙嘴和120位fans舉行生日慶祝會backtoschool，玩校服主題，Baby一身造型更似足栢芝在《喜劇之王》的學生妹。
Baby所屬的公司Style送了一個三層高生日蛋糕給她，更安排兩個外籍男模左右獻吻，一咀完Baby即滿臉通紅，更見她腳震震。之後頻呼「好熱」，她說：「好驚呀，估唔到公司畀咁嘅surprise我，搞到我流晒汗，腳震晒，死啦。」
傍晚似有約
傍晚6時多，Baby出席完活動就火速趕返家換衫，似是佳人有約。不久Baby坐在拉上布簾的座駕離開，其座駕左穿右插撇甩記者。
非常巧合地，近期和Baby緋聞傳得熾熱的黃曉明，本來近日身在內地拍劇，昨日專程放假飛到香港一天，莫非為Baby慶祝生日？
食糖水倒數
其實Baby前晚已開始預祝生日，在金鐘出席公司Style春茗，更和熊黛林玩wii、食壽包，之後相約一班同齡好友，晚上11時多去了九龍城糖百府食糖水，Baby和好友開心得嘩鬼叫，一齊倒數切生日蛋糕，玩到凌晨1時才返家。
採訪：JessicaNgan
攝影：EdwardChou、YeungHoYin