教協同支聯會戰友今日為華叔慶祝80大壽，原來噚日已經有老友預先同華叔切蛋糕，一班因為六四事件同華叔結緣，已移民美國嘅香港人，同埋李卓人、白鴿黨主席仁哥等，噚日已急不及待率先同華叔食晏賀牛一。
癌細胞指數跌至23
有份參加生日會嘅公共專業聯盟副主席莫乃光同八方講，有兩個朋友特別從美國飛返香港為華叔賀壽，佢指華叔精神甚好，十分開朗，飲茶食點心胃口不俗，只係因為做化療要戒雞。華叔做兩次化療後，癌細胞指數由40跌至23，佢透露上星期一曾留院三日全身檢查兼腦掃描，證實癌細胞冇擴散，肝臟附近一個小腫瘤消失，病情初步受控。
華叔又向老友透露，中醫叫佢食蟲草、雲芝補身，並每日三次飲一個雲南彝族「神醫」秘方冲劑，呢個「神醫」正在北京，想申請嚟香港幫佢睇症，八方希望北京畀佢保外「行」醫啦。華叔話化療後未有明顯副作用，近日食得、瞓得、屙得，一日三餐，想瞓就瞓，肥咗5磅。
facebook有群組祝華叔身體健康，已有逾8,000人加入，華叔都有上網睇，佢話感激各界人士支持，回顧80年人生，最大收穫係搞社運識咗好多知己。華叔一班朋友好有心思，收集歷年同華叔合照，製成圖片冊送畀華叔做大壽禮物，華叔收到好開心，談及相中人當年情景，近年情況，記性甚好。