香港建設（190）打橫行咗大半年，超級大落後，一於長、短棍炒波幅兼博長線大增值。港建最新NAV1.36元，現價0.58元折讓57.4%，呢個折讓，相對好多呢期大調整嘅內房股吸引。
港建投資物業連發展中物業最新賬面值89億銀，以項目每增值10%計，可以為港建帶嚟額外近9億銀增值。要咁睇，齋計人民幣中線升值，分分鐘抵得上呢10%增值，而祖國樓市中線好景，港建所揸住嘅項目，又係主要城市超優質地段，增值潛力更加優厚。重估港建NAV上到1.65元，折讓上到65%，更加吸引。
呢轉買港建，一於長、短棍，一注喺0.5元至0.68元間炒波幅，回報率36%；另一注擺中線，博港建折讓收窄到40%，股價重見1字頭，現價回報率講緊72%。
北青博升4成
北青傳媒（1000）最新NAV7蚊，每股淨現金又係7蚊，現價4.95元較每股淨現金潛水29%，PB亦係喺1倍樓下。市場呢期開始提及嘅文化媒體產業概念股當中，北青PB好吸引。又最近1年所見，北青50日線一追到上10日及20日線，股價就扯一轉。呢期北青50日線又同10日、20日線搞滙合，技術上支持一轉升勢。冷吼北青，博見NAV7蚊，現價回報率41%。
錢雋