林村許願樹受盛名所累，承受唔起數以十萬計願望，鄉公所改以仿真許願樹代替，以玻璃鋼製成嘅新樹負重力高，可供全天候擲寶牒，區議員陳灶良稱今年大年初一至三，估計有高達八萬人次到林村。
仿真許願樹任勞任怨，應該物盡其用，大埔區議會主席張學明透露正構思年底舉行許願月，號召全港市民齊齊許願，並將許願月其中一個星期日定為許願日，總之有求必應，一次過滿足市民許願訴求。
身兼鄉議局副主席嘅張學明又話，為咗贊助局方沙田新大樓建造費，有村代表建議將每季獲當局提供嘅2,000蚊津貼捐出一半1,000元畀鄉議局，以示鄉民同心協力支持興建新大樓，佢話如果成事，對局方而言係穩定收入，幫補唔少。