台上一分鐘，台下十年功。77歲的林家聲花在台下的時間又豈止短短10年，這位入行逾50年的粵劇名伶，日前接受本報專訪時慨嘆今時今日藝人修養越來越不夠，就連戲劇排練熟讀劇本基本要求亦未能做到，一切只留待「台上見」。
戲行裏常說「台上見」，表面看似祝福的客套話，其實暗含貶意，林家聲笑說：「以前啲老倌成咗名之後，啲人叫佢練戲佢唔去，淨係同人講話『台上見』啦，係揶揄啲人懶囉。」聲哥表示功要日日練才能精益求精，他補充說：「唔單止粵劇行，放於其他演藝事業都一樣，正所謂一日不練自己知，兩日不練行家知，三日不練觀眾知，勤唔勤力呃唔到人。」
重戲德勤讀書
眼前精神奕奕的林家聲雖然患上柏金遜症，活動不如從前般靈活，但仍堅持每日操曲4個小時，他笑言有時唱得興起，可以唱足半日。聲哥又告誡現今的藝人要多讀書，他說：「目前啲藝人睇書少，睇多啲書可以增加你嘅書卷氣。而且戲德好緊要，我哋入行之時，未學戲就先要學戲德，勤力練功做好本份，就係其中一部份。」
傳承粵劇圓夢
退休多年的林家聲今次再跟戲迷見面，為的就是要完成亡妻的心願，將粵劇傳承下去。今日他會在尖沙嘴文化中心開設講座，同日推出兩本名為《唱做唸打》及附有林家聲折子戲DVD《我的演出法》的書。聲哥表示每本書都花了4個月時間完成，單是揀選珍藏的照片、對稿等工作已經很費時，不過就希望藉新書可供後輩參考他的演唱心得，他說：「只要你肯學我就肯教，總之就唔好玩玩吓就得嘞。」
採訪：何永寧 攝影：黃偉雄