久未露面的黎明嫂樂基兒，前晚長假後亮相ball場，被傳有孕的她自爆和黎明在峇里滑水度假，為有喜傳聞闢謠。另一天王嫂熊黛林則和李玟撞衫，雖然身材艷光大勝後者，但遭李玟搬男友Bruce出面助威暗寸。
每年冬休返美的樂基兒，休息期間不時傳出有孕。她前晚在灣仔出席CancerFund慈善晚會，穿上Chloé收身黑裙現身，曬得一身古銅色的她，自爆放假期間和老公黎明去峇里度假，她說：「仲有成班朋友，去滑水。」新年情人節二人世界？她說：「都係成班朋友囉，我哋一齊唔使工作，大家有假放，已經好滿足。」
樂基兒派利是冇Feel
樂基兒被問到旅行期間有沒有努力造人？她即說：「呢啲唔答。」兩人去年已婚，黎太可以名正言順派利是，樂基兒說：「主要係派畀小朋友，都冇乜特別感覺。」訪問期間，另一天王嫂熊黛林到場，樂基兒即自動讓位離開，記者要求兩人合照，她卻快閃入場。
熊黛林穿上JustCavalli的斑馬紋晚裝，谷出性感警鐘胸。訪問接近尾聲時，李玟竟着住同一條裙到場，避無可避下，兩人大方合照。比拼下以熊黛林的標準名模高䠷身形勝出，李玟就出口術爭回面子說：「其實我一直好想見佢，因為我聽家姐講話佢鍾意聽我嘅歌，我哋一樣有好嘅taste。」
李玟拒除褸正面交鋒
李玟明知輸蝕，即拒絕除褸和Lynn正面交鋒，更搬男友上台暗寸單拖赴會的Lynn，她說：「我買呢條裙時，已經同sales講一定撞裙，Bruce好似我嘅accessory，襯得我仲靚。」
至於緋聞男友郭富城從不陪伴身邊的Lynn，則直認情人節在南京過，當日也沒有收到城城的禮物和短訊，之前城城被影到買花及朱古力，她不是味兒的說：「佢咁早買，一定唔係買畀我。」
採訪：顏英儀
攝影：陳俊強
