「五區請辭，全民公投」之補選，定於五月十六日舉行，左丁山不以為意，點知中國專家Ｃ忽然一問：「點解要五月十六日舉行補選，嗰日係敏感日子噃？」左丁山一時唔知佢講乜，只能含含糊糊咁答：「有乜敏感呀，五月十六日係星期日，跑馬之嘛？」專家Ｃ話：「你唔知道有五一六通知呢回事嘅咩？」咦，又好似有印象噃，隱約記得係文革年代之事，但詳細內容已經唔記得晒。專家Ｃ講：「費事教你，你自己上網睇多啲啦。」
於是谷歌一下「516通知」，嘩，湧出不少文章，一睇，知道嘞，一九六六年五月十六日中共中央政治局擴大會議發出，中國共產黨中央委員會通知，係發動文化大革命嘅第一炮，為文革吹響號角，史稱「五一六通知」。此通知由陳伯達、康生、江青、張春橋、戚本禹等人起草，經毛澤東修改，內容殺氣騰騰，批鬥文化革命五人小組，提出重新設立「文化革命小組」，剝奪中央政治局、中央書記處之權力；毛澤東講「不破不立」。破就是批判，就是革命，就是要講道理，講道理就是立，破字當頭，立也就在其中。後來只破不立，將不少文物文化破壞殆盡，害人無數。
「五一六通知」開始咗中國十年浩劫，埋葬不知多少精英，害慘中國，故此一九六六年五月十六日係一個值得所有中國人記住嘅悲慘日子。林公公與佢班手下大概仲懵過左丁山，佢對五一六完全冇印象，故此選擇咗五一六為議員補選日期。專家Ｃ猜想更多，佢話：「五位辭職議員以全民起義為口號，中國歷史上起義就係搞革命或者係棄暗投明，在當權派面前講起義，就係公然表示反叛。林公公會唔會特登揀五一六，內裏含義就係：你哋就係反革命，將五人定性呀！」林公公有咁複雜嘅腦袋？唔多信，講「五一六通知」，黃毓民與梁國雄應該熟過林公公多多聲！呢日碰到議員Ｐ，佢話黃毓民實唔會再選議員，令左丁山為之愕然，問佢有何根據，佢話黃毓民醒目過人，識得諗嘅嘞，唔肯再講落去，令到左丁山滿腹狐疑。議員Ｐ話：「搞政治會中毒嘅，明知冇前途都要參與，聰明人應該懂得戒毒！我自己就笨笨哋，不知如何戒毒！」