小朋友時，睇完鬼片總唔敢一個人瞓，驚門口、窗邊有「嘢」飄過，自己嚇自己！《午夜靈異錄像》最成功可算係捕捉心理，明知驚屋企有「嘢」，就將佢拍成電影，仲出埋DVD；如果你夠膽，不妨今晚坐定定喺床邊觀賞，睇吓劇情會否發生在你身上。
記者：陳國輝
雙版本結局
嚇唔嚇得死人，恐怖氣氛好緊要！老實講，如果你已經入過戲院睇，仲點會買DVD返屋企再睇一次？唔睇你未必信，《午夜靈異錄像》實情以屋企嘅連串怪事為賣點，當戲內發生奇異現象，可能會令你諗：「我屋企都好似曾經有類似事況喎！」例如，屋內突然有陣風吹過、睡覺時客廳外發出聲音，甚至房門會無故自動打開等。究竟呢啲係巧合？定係鬼神作怪？當然唔知，但如果選擇喺屋企睇呢齣恐怖片，或許會感覺到，呢啲怪事隨時會喺自己屋企重演一樣。
當然，DVD亦收錄咗戲院睇唔到嘅Bonus片段，講緊就係「另一靈異結局」。內容唔多，長度得幾十秒，但相信好多人都想知女主角下場會點。另外有人話，YouTube上亦一直流傳咗幾個結局版本，比DVD更多，實情真定假，大家不妨上網搵吓。
靚聲畫欠奉
《午》僅推出VCD同埋DVD版，唔知稍後仲會唔會出埋Blu-ray版，但就算出咗街，亦唔好諗住有靚聲靚畫滿足你！原因好簡單，呢齣電影本來以真實事件為題材，除咗用主觀鏡頭拍攝，基本上感覺十足自家製作嘅小電影，畫面矇矇查查，莫講話高清細緻嘅畫質欠奉，就連突如其來嘅背景音樂都無晒，與近年勁玩聲效嘅恐怖電影，差別相當之大！會唔會缺乏Effect下無咁恐怖？就要睇你膽量，之但係論真實感，《午》的確幾有驚喜，如果你睇恐怖片睇到無晒Feel，咁要試新嘢喇！
故事背景
每逢深夜，姬蒂就會被靈異物體纏擾，男友米高對之半信半疑，為尋找真相，每晚拍低二人睡覺嘅情況，果然，攝錄機拍攝到詭異影像！但係米高仲未識驚，繼續用各種科學與傳統方法，逼佢現身，最終卻自招惡果。
Profile
格式：DVD
長度：86分鐘
畫面：16比9
特別收錄：另一靈異結局
DVDPro（23326326）
