東京、倫敦、巴黎、香港老早已不夠我買了，不是因為她們不夠好，只可惜我已踏入狼虎之年，像個35歲後皇宮大閘開始閂埋的女人，或者年近半百需要問定偉哥的電話地址，預備和他交朋友的佬──不顧是否體力不支，總之無故胃口大好，可以多一次就多一次，未試過的能做就盡快做──再講這比喻就流於猥瑣了。
總之去多幾個未去過的城市，買多幾件未有過的東西，趁還買得起走得郁着得到而不致於太超齡……
總之每年盡量讓自己去一兩個未去過的地方，甚麼都不做，齋買嘢，尤其是着得上身的，目標是：知道晒全個世界嘅靚衫喺邊度，成為最絕的人肉購物指南！（是為我的「買嘢買到XXX」系列）
今年首先中籌的是──燈燈燈凳，瑞典斯德歌爾摩。
對，他們的燈燈燈和凳的確比時裝好買得多。
一個鏡頭看斯德歌爾摩
如果只准用一個鏡頭了解一個城市，我揀這一部在每個超級市場都有的「舊樽罐回收機」，市民將吉的容器丟進機器，可得該超市的現金購物coupons，價值由0.5至2瑞典克朗（Krona）不等，我飲完我的零可樂拿拿臨將個「真」丟進去，得1克朗贈券，喜孜孜再入閘shopping，才發現350ml汽水都要20克朗（1克朗=約1.09港元，即可當港紙使，如果可以退稅的話），反而一部全新Nokia手機才299，買一箱24支可樂貴過一部電話。那麼這一格鏡頭看到Stockholm的甚麼？國民教育水平高，環保，但基本生活消費貴，科技產品卻便宜。
兩個必問問題
每到一個新城市我都先找個當地人盤（問）一下：
A.你們的裏原宿在哪裏？
B.你們最高級的百貨公司是哪一間？
A.的答案是沒有，但他們有H&M，基本上有了H&M（而且真的很多很多很多間），瑞典人就不再需要甚麼裏原宿了，事實上，有了H&M之後瑞典有很多東西都不再需要，詳情下星期有專題報道。
至於B.則是NK百貨公司（注意！注意！以下爛gag出沒注意！），他們的NK大概相等於我們的MK吧，一切人流最多，旺過旺角的購物區都是圍着它而發展起來的，所以一入去大概已摸到這個城市的底，時裝底。
說他們不緊貼潮流又不是，在鞋袋部裏他們又識得將AlexanderMcQueen上季的鞋與袋擺在減價貨品的第一排；但說他們很fashion咩？Fashion就不會成季JilSander只入6件嘢，而且和過去六季的舊貨混在一起賣吧？如果不想幫襯瑞典土炮牌子如TigerofSweden和Whyred之類，比較有趣的選擇是他們的multi-brandshopinshopPaul&Friends，Watanabe、KVA、Givenchy樣樣總算有幾件，但不要期望它是Joyce或I.T。
有個打算「豪使」的朋友找到全間百貨店最貴的部份──一間得貨櫃箱面積大的Hermès，朋友還心存僥倖，博人哋落後唔興Birkin袋，居然問售貨員：「有冇鱷魚皮Birkin？」個售貨員又老實得滯：「我哋見都未見過呢樣嘢。」
「咁可唔可以問吓其他分店有冇？」朋友還死心不息。
得到的答案是：「對唔住，我哋係全斯德歌爾摩唯一嘅Hermès。」
朋友當場暈倒。
……及其他
搽完X花油醒番的朋友惟有改向其他名牌埋手，全城地氈式調查結果並不出人意表：LouisVuitton1間、Gucci1間、Prada、Chanel、Burberry、YSL、GiorgioArmani、Dior等專門店全部0間，好彩的話在百貨公司還有個counter仔或在multi-brandshop掛幾件出嚟，否則好像AnnDem、Yohji、BV咁「冷門」你都唔使旨意。
有點看頭的selectshop也不多，比較似樣的是MrsH，雖然都蚊型，但Balmain、AnnDem、AlexanderWang都總算有幾件。次選NathalieSchuterman、Balenciaga、Prada、Chloé每樣有少少，但眼光都比較保守，如果你喜歡唔「時」嘅時裝，這裏是不錯的選擇。
反而有……
如果在斯德歌爾摩shopping有任何迷人的地方，那一定是「你以為佢有但係冇，你睇死佢冇反而有」的反邏輯。
近年所有懶有品味的男士都推崇備至的雜誌《Monocle》，眨吓眼已發展到有自己的產品系列甚至商店了，但由於是起步階段，紐約、倫敦、東京和三藩市外很多大城市都分不到一間分店，偏偏Stockholm卻有，雖是期間限定店，但總之是有啦，不過這間在傢俬店CARLMALMSTEN的店中店地址無謂寫出來了，反正你現在也趕不切去的。
無酒之Pub
無人答到我邊度係裏原宿，惟有自己找最接近的，又居然畀我搵到間叫Pub的年輕人百貨店，像一間瑞典6層樓版的0101加D-mop加Shine，如果還未明，數數它有賣的牌子你便知發生咩事了：Ann-SofieBlack、April77、Bless、PeterJensen、FifthAvenueShoeRepair……喜歡這陣「除」的人自然聞到。咁似乎Stockholm，又悶唔晒喎。
豈不是Hopeless？
悶，只因未講到戲肉啫。
你可能知可能未必知，數數吓其實幾多我們常有幫襯的時裝牌子原來都是瑞典出品，例如AcneJeans、CheapMonday、FifthAvenueShoeRepair、Whyred，還有，道理就正如你在巴黎搵間唐餐館食飯，入到去很多時都發現餐牌上，除了咕嚕肉，竟然還有生牛肉河、海南雞飯、三文魚壽司同擔擔麪一樣，在瑞典你還可以一次過得到埋種種鄰近北歐國家的名產，例如Marimekko的花布、Lego的積木，甚至姆明的產品……砌砌埋埋其實都夠你逛兩三日的了，下期再為你詳細介紹吧。（待續）
本周大獎
出發前身邊有不少朋友問：「點解係瑞典。」
頭一兩個問都有心機答，答答吓嫌煩一句搞掂：「我去攞諾貝爾獎吖嘛！」
「吓？」大部份人的反應。
只有容祖兒立即get到，答我：「唔，我覺得呢個獎係你應得嘅！」
於是我就真的去斯德歌爾摩市議會大樓，付了50克朗，走走BlueHall那條在慶祝晚宴上，每個得獎人都要拾級而下，接受萬人仰望的長樓梯了，當時的感覺是，如無意外我知我應該一生人都沒有機會拿諾貝爾獎的了，但人各有志，路是我一早自己揀的，想起一走完這幢樓梯，就可以回去寫遊記而且還有些人等着看，就不禁眼濕濕，我覺得自己得到了比文學獎更好的東西呢。謝謝各位又陪了我一個周日，BuyMeASunday數一數原來在此剛好四周年，謝謝。真的，謝謝。
Textby黃偉文
mailto:[email protected]
本欄逢星期日刊出
