五區公投5月中舉行，公、社兩黨應該忙到飛起，不過操盤手之一社民連主席陶君行卻做「逃兵」，聽日會同太太孔令瑜出發去印度玩一個星期。八方問佢做乜丟低手頭工作，佢解釋好難得先有時間同老婆行開吓，事關之前要做社會服務令，加上有案在身，遲啲分分鐘失去自由，所以要及時行樂，爭取時間同老婆享受溫馨時光。
其實阿陶家人對佢心口掛住勇字都頗擔心，佢父親過去20年從冇過問阿陶搞社運，僅幾年前提醒佢唔好反對領匯上市，「佢話我再咁搞落去一定死梗。」點知今年大年初一佢返老家拜年時，老父竟然「開金口」，表示對公投運動深表憂慮，陶太孔令瑜安慰老爺，話如果阿陶家陣轉軚，咪形同劉江華？相信陶家上下都唔想阿陶會俾人指罵最無恥，阿陶無透露父親有乜反應，只係大讚老婆醒目。