《歲月神偷》真係好hit，由於電影喺拔萃男書院取景，導演羅啟銳又係男拔仔，DBS噚晚就藉此舉行慈善首映，籌款畀以退休校長郭慎墀（Lowcock）命名嘅一個快乾塘獎學金。
DBS同喇沙書院係死對頭，喺學界比賽鬥到有你冇我，偏偏噚日DBS請喇沙仔財爺鬍鬚曾做主禮嘉賓，校長張灼祥話根據傳統，喇沙仔到男拔要戴番條男拔校呔先至安全，所以會叫校友醒條校呔畀鬍鬚曾戴，逼佢「變節」。
呢場籌款首映係男拔140周年校慶活動之一，好多個月前已安排，張灼祥話原本訂咗六間戲院，後來減少兩間，點知《歲月神偷》一夜成名，人人撲飛，但都係只能補回一間至五間。噚晚有約1,000人睇戲，籌到近300萬元，資助男拔生留學。