要電影感動觀眾，導演必先感動自己，沒有比自己的經歷更能打動自己，羅啟銳以9歲童年往事寫成電影《歲月神偷》，完成了基礎的第一步，誰知往後的故事更漫長，拍攝也波折重重，故事到此亦略帶傷感。不過因為一座柏林水晶熊，為羅啟銳的「童年」加上色彩，故事也由悲情變成欣喜。
撰文：何永寧
如果說電影《秋天的童話》是張婉婷少女時代的寫照，夫子自道的故事，剛在柏林影展勇奪水晶熊獎的《歲月神偷》，就是拍檔羅啟銳40多年前成長的回憶，劇本來自他孜孜不倦寫成的日記，當中有笑有淚，有對早逝大哥的追憶，也有對60年代那個不再存在美好時光的嚮往。
羅啟銳說：「細個時住喺深水埗唐樓，嗰時嘅人生活雖然艱難，但係一個美好年代，太平盛世，左鄰右里大家都識，啲細路好似我咁可以通街走都唔驚，夜晚家家戶戶去樓下唞凉傾偈，已經係好好嘅娛樂。家住你隔籬嗰家人姓乜你都未必知。」
思念亡兄感觸落淚
電影故事緣自羅啟銳9歲時的經歷，除了緬懷過去，也讓他解開40多年的心結，他說：「同哥哥雖然年齡相差6、7歲，但係大家關係好親近，佢讀書運動都好叻，嗰個年頭入到拔萃好犀利，內心其實已經當咗哥哥係我偶像，佢突然離世對我打擊好大，不過當時年紀細唔知。」直至今日回想才發覺哥哥在他心中佔很大比重，他感觸地說：「哥哥唔喺度之後，試過有一次坐喺張凳度乜嘢都冇諗、冇做，直到阿媽喺廚房同我講『阿仔，細路仔唔好發吽哣，你發咗兩個鐘嘞』我至驚覺自己坐咗兩個鐘，你話咁細個細路邊識發吽哣？仲要兩個鐘咁耐。嗰一刻個人真係好空白，感覺好徬徨。」
到40多年後的今日，羅啟銳拍回當日的情節也感觸落淚，他笑說：「喊嘅時候劇組同監製張婉婷都知，不過佢哋扮睇唔到，張婉婷會幫我叫cut囉。」羅啟銳表示隨着電影拍攝完成，有從當年夢魘釋放出來的感覺。
唔夠錢拍基金打救
其實劇本羅啟銳早在10多年前已經完成，由於題材比較偏鋒，長久以來都沒有人肯投資，羅啟銳說：「劇本係創作人自己有感覺，老闆係計數嘅，特別電影涉及咁大投資，而且仲係拍懷舊片，好多道具佈景都要重新做過，冇得平，今次拍到出嚟真係好彩。」不過當電影有機會開拍，卻一波多折，張婉婷說：「嗰時埋晒班，錢又用咗幾十萬，先發覺仲差幾百萬至夠，真係好擔心，劇組逐日計錢，咪惟有同工作人員講可唔可以停薪留職，嗰時真係徬徨到乜都試，最後好彩有電影發展基金打救。」資金緊絀令很多原先的構思未能實行，卻令他們悟出另一番道理，羅啟銳說：「去到後段想搭一個街邊粥檔嘅錢都冇，任達華同吳君如惟有由買粥變成食缽仔糕，出到嚟嘅效果反而仲好，感覺仲有情懷，所以困難有時都係一個機會。」
藉電影推廣旅遊業
對於電影越來越商業化，羅啟銳坦然無可厚非，他說：「電影既可以係商品，亦都可以係藝術，但政府官員就唔可以咁睇，電影係對地區好好嘅推廣，特別係一啲有特色嘅建設好似永利街咁。你睇台灣電影《海角七號》成功，成個屏東嘅旅遊業幾興旺，呢啲係無形利益。」這趟在柏林影展榮獲水晶熊獎，羅啟銳半開玩笑表示這隻熊為他緊絀的宣傳費注入資金，他說：「唔只宣傳多咗，連帶我嘅童年都變得好熱鬧，多人提咗。」
故事簡介：奮鬥家庭笑中有淚
《歲月神偷》以導演羅啟銳童年往事作藍本，以叫人思念的60年代舊香港為背景。故事從一個做鞋的小家庭出發，永遠踏着一雙破鞋的父親任達華，凡事愛出頭；能撐半邊天的母親吳君如，文武兼備；長子李治廷對愛情與未來充滿夢想，倔強好勝，與富家女蔡穎恩發展了一段不可能的愛情。
天資聰敏的幼子鍾紹圖能倒轉背誦26個英文字母，更把父母弄至啼笑皆非。這個典型的小家庭，共同面對人生的起跌與無常，笑中有淚，故事感人。
《歲月神偷》上映日期：3月11日
李治廷喜提名新人獎
新人李治廷在《歲月神偷》飾演吳君如和任達華的兒子，蔡穎恩飾演其女友，首次拍攝電影便獲提名香港電影金像獎最佳新演員的李治廷，顯得受寵若驚說：「第一次拍戲就拍住影帝同影后，仲要有新人獎提名，上天真係對我好好，開心到唔識講，感覺好幸福同複雜。」
李治廷笑指距離金像獎還有一段時間，自己現在還未識緊張，感覺似發夢很不踏實，他說：「家感覺仲好似啱啱拍完戲，連部戲都未睇，一啲都唔覺得自己獲提名，感覺好抽象。」
蔡穎恩咀戲唔過電
蔡穎恩讚導演羅啟銳對新演員很有耐性，她表示與李治廷拍親熱戲時全情投入，一點也沒尷尬，她說：「我哋認識三個月至拍咀戲，佢又教我彈結他，大家好似兄弟，冇過電，我哋成為好好朋友。」
撰文：張俊銘
場地提供：Starbucks（13Duddellstreet）
李治廷髮型：SunnyYuofHairCulture
李治廷化妝：BillofA&VMakeupSchool
蔡穎恩服裝提供：Heather
