港鐵絕對是港人最常乘搭交通工具之一，搭車前後，總有肚仔餓的時候，於是乎沿線鐵路站便成為開餐熱點，小吃店外賣店林立，開餐還開餐，並非讓大家坐車開餐，而是於返工放工放lunch時吃得方便又滋味，當中不少更是人氣熱爆食店！
記者：梁美甜
攝影：林栢鈞
Model：Leanne@PureModels
觀塘站
靚人型人抵食拉麪
位於觀塘站的北京拉麵店，屬外賣店，桌椅一張也沒有，然而，每到午飯時間，例必大排長龍，必試蜜汁豬扒湯麪及紅燒豬軟骨紅米菜飯。新鮮豬扒自家搥鬆後加入調味及蜜糖醃製，即叫即炸，熱辣辣鬆軟味濃，肉味鮮香汁又豐；豬軟骨以秘料醃製燜足兩小時後，肉鬆味濃之餘，軟骨更是腍中帶嚼勁，好味，再配具口感的紅米菜飯，旋即俘虜附近無數OL、型人及追求健康滋味一族，最重要是滋味得來價錢夠晒抵，一個麪廿零蚊連杯熱奶茶或咖啡，轉凍飲加$2，埋單都不過$30，比一般茶記還要平。抵食又健康，湯麪、菜飯都是熱賣款式，平時日賣50-80個，外賣店都足以媲美餐廳食肆。
1.蜜汁豬扒湯麪連熱飲$25
以新鮮豬扒加調味及蜜糖醃製後炸成，難得搥鬆後的豬扒鬆軟又腍，有order才即炸，一客兩件，配彈牙拉麪超滿足，日賣50-80碗之多。
2.酸辣湯拉麪連熱飲$25
以豬骨熬成上湯，再加木耳豬皮豬肚甘笋等材料及辣料炮製成酸辣湯，嗜濃味者至啱！
紅燒豬軟骨紅米菜飯連珍珠奶茶推廣價$20
豬軟骨以秘料醃製燜足2個鐘，連肉中的軟骨都腍得來帶嚼勁，味道香濃，佐紅米菜飯一流。
加入紅米的飯好有口感，豬軟骨入味又腍，好食！
花雕醉雞$25
原隻雞放入以秘方熬成的上湯中浸熟，令雞肉嫩滑又汁豐，有order就切件加入醉雞酒而成，入口出奇地充滿酒香，份量足，一客差不多4隻雞呢！
紅油抄手$23
必試小吃！一客八粒，以半肥瘦豬肉調味製成餡，即叫即灼再淋上醬油及辣油，賣相一般，但入口肉味超鮮香！趁熱吃！
於附近工作，每星期都會光顧四五次，紅米飯夠健康，最鍾意食豬軟骨，好味！（難怪皮膚如此靚。）
每星期光顧兩三次，價錢平味道OK又健康，最鍾意食菜飯同糙米飯。（所以身形咁fit。）
北京拉麵店（23457360）
港鐵觀塘站KWT25號舖（近A1出口）
香港站
OL捧肉餅飯無渣湯
香港站的ChineseSpoon，前身為TheSoupCafe，一月改名，仍以無味精無渣老火靚湯為主打，無渣並非料少，但湯渣都去了哪裏？「溶晒！我要求湯料要夠味又可煲到溶於湯水中。」老闆Maureen說。當然，湯熬足六七個鐘也是「無渣」原因之一。讀營養學出身的Maureen講究真材實料又講營養，湯水全是老火湯，主要分雞、魚及豬三類，午餐堂食$63有白飯、中size老火湯、一個小菜，外賣更平，「唔使我提供餐飲服務又唔會霸住桌椅，當然更平喇！」老闆笑說，外賣午餐$49就有交易，在中環區，抵食；難怪一到午飯時間就不時爆場，遇着天雨仲誇張，超長龍，不少老外更為了啖中湯及家常小菜而頻頻來外賣。老火湯體貼地以保溫壺及杯上桌，以杯代碗喝得更方便，就算吃完飯才喝，依然熱辣辣！魚湯及雞湯類最熱賣，日賣近200杯；小菜中的蒸肉餅，以脢頭肉加赤肉及調味配料，以人手打至起膠再蒸成，健康又夠媽咪feel，日賣六七十個，勁！
1.木耳鹹蛋蒸肉餅套餐$63
套餐包一餸一飯及一壺老火湯。以鹹蛋黃和少許蛋白，加脢頭豬肉、瘦肉、木耳、馬蹄等手打至起膠成肉餅蒸成。肉餅中肉佔六七成，汁豐味濃。
2.蝦醬蒸肉絲套餐$63
脢頭肉加蝦醬醃過再蒸，味道鹹香下飯一流。最重要是材料無落味精，食後不會涸。
3.姬松茸冬菇花膠煲雞$38
以靚姬松茸、冬菇、筒膠浸發後加走地雞再煲至料溶，上桌時隔渣，湯水超濃又具冬菇香！
每星期起碼食三次，價錢經濟又真材實料，愛飲花膠雞湯，對皮膚好。
ChineseSpoon（29152261）
機鐵香港站L1HOK12B舖
太子站
漢堡扒飯糰日賣400
西龍傳香飯糰於不少港鐵站都有分店，主要供應六款米飯，每款因應米種及味道而加入糯米或其他穀物，再以木桶蒸煮而成。配料達50款，鮮、甜、鹹、香、辣、爽等味道口感豐富，即叫即製，新鮮熱辣。飯糰套餐包飲品，有人氣的紫米豆漿、用料豐富的五穀米漿、黑豆漿或加$10換果醋，豆漿及果醋是由台灣自家工廠生產。自問愛香口惹味，推介芝味五穀米飯糰及燒汁肥牛小麥胚芽飯糰。前者加有芝士、漢堡扒及海苔肉鬆，漢堡扒味濃又有肉汁，肉鬆和芝士令整體口感更香更複雜，難怪成為小店熱賣款式，日賣三四百個。後者以本地肥牛加秘製燒汁，肥牛油脂甘香加燒汁味更豐富！
1. 燒汁肥牛小麥胚芽飯糰餐$28
本地肥牛醃製煮熟後，加入自家秘製燒汁而成。肥牛甘香，汁醬惹味，配爽口海帶芽，夠晒滋味！
2.芝味五穀米飯糰餐$29
五穀實質有薏米、糙米等十多種穀物炮製，口感豐富，加入濃郁的漢堡扒及肉鬆，芝士令飯糰更香鮮惹味。
3. 香酥玉米雙色飯糰$16、蘋果醋$12（跟餐加$10換）
香酥指香菜酥，以花生及蔬菜碎烘焙的鬆脆蔬菜粒，加入台灣鹹香的牛蒡絲及粟米，素食者至啱！
西龍傳香飯糰（27890731）
港鐵太子站大堂PRE21號舖
