誰不想風生水起，為了願望成真，李珊珊把家中兩頭愛犬分別改名水水和起起，配上「媽咪」珊珊名字諧音，馬上願望成真。珊珊視兩頭愛犬為子女，而且家教甚嚴，愛犬頑皮立即家法伺候，甚至要被困洗手間坐監。 撰文：比華利
港姐出身的李珊珊對扮靚很有心得，家中添了雌雄寶貝狗水水和起起後，身為「媽咪」的她最大樂趣就是替牠們裝身。李珊珊平均每個月都會帶兩頭貴婦狗到寵物美容院扮靚，包括冲凉、剪毛和修甲，當然也少不了選購靚衫、飾物和玩具。
水水雖然是狗仔，但牠甚有狗模風範，性格活躍好動，有時甚至叫唔停，但當牠穿上靚衫，性格卻180度大轉變，變得斯文淡定，舉止如紳士，珊珊日前說：「好奇怪，水水真係好鍾意着衫，每次着咗就立即定晒，不過妹妹起起就啱啱相反，佢好唔鍾意着衫。」
紮辮扮靚最耍家
拍照當天，珊珊還跟日籍寵物美容師學習幫起起紮辮扮靚，只需幾下手勢便在兩耳束上彩珠，令全身黑毛的起起份外突出又可愛，鏡頭前的起起頗有「港狗」風範。
當珊珊專心照顧起起時，不經意打爛水水醋埕，牠不停在附近團團轉和狂吠，希望引媽咪注意，珊珊耐心地向水水講解，牠才肯定下來，她說：「最初買咗水水返屋企，我對佢真係投放咗好多感情，始終狗仔壽命有限，我放好多時間同佢溝通，佢好嗲我，因為水水，我黐家咗好多。養得一隻，我又諗應該可以養多隻，於是咪買埋起起返嚟，養狗令我多咗耐性，佢哋好似小朋友。」
定家規賞罰分明
為了訓練水水和起起乖巧，珊珊除報讀訓練小狗的課程外，她也為兩頭愛犬定下嚴格家規，珊珊說：「我賞罰分明，邊隻曳都要受罰，冇情講。佢哋一曳定咗罪，我要困佢哋入由洗手間改成嘅水飯房幾粒鐘，就算幾唔願意都要接受懲罰。」雖沒有育兒經驗，但飼養了水水和起起後，令珊珊母愛氾濫，但堅信不會慈母多敗兒。
為愛犬買醫療保險
人可以買醫療保險，原來寵物同樣可以，珊珊兩隻愛犬早前腸胃病，並交叉感染，先後屙血，水水更嚴重到要住院，嚇壞「媽咪」珊珊。起起的後腿骨也曾出現毛病需動手術，所以近年珊珊開始替愛犬購買醫療保險，生病時可接受最佳的治療。
一年幾千蚊保費
到底犬隻的醫療保險有甚麼不同？珊珊說：「情況同人一樣，一年畀幾千蚊保費，佢睇醫生同入院都可以得到最佳保障，狗仔睇醫生分分鐘貴過人，始終狗仔得十幾年壽命，我想佢哋開開心心，健康成長。」不過寵物保險僅限醫療，至於遺失和壽命則不在受保範圍。
珊珊回想水水上次屙血留醫，她猶有餘悸並擔心說：「自從買咗水水返嚟，佢從未離開過屋企，但嗰次佢病到咁嚴重，獸醫要佢留院，我都好唔捨得，因為狗仔心靈好脆弱，佢會以為俾主人拋棄，小狗都好似BB仔咁，所以獸醫嘅貼士係帶埋佢哋嘅玩具去醫院陪佢，咁狗狗先會安心啲。」
攝影：黃偉雄
化妝：JaniceLam
髮型：JacksonYung（ILColpo）
場地：PawPalace
