家啲手機功能真係唔簡單，聽歌、影相、拍短片唔在講，有啲仲有埋GPS全球定位系統。小藍揀手機，首要睇吓佢啲音樂功能，同埋啲聲靚唔靚啦。
消委會最近就測試咗30款手機，包括19款智能手機、7款3G手機、4款GSM手機，其中17款手機嘅音樂功能都得到4星評分（最高5星）。整體成績，三星同諾基亞成為大贏家。
消委會老友話，一眾手機經過電話功能、短訊息功能、照片功能、音樂功能、上網功能、同步功能，同埋便攜性等基本性能測試，喺智能手機類別三星威晒，佢哋嘅l8910HD同M8910Pixon12型號評分最高，分佔頭兩位；前者同步功能表現好好，仲內置咗8GB記憶體同埋夠耐用，後者短訊息功能理想，內置埋1200萬像素嘅鏡頭。兩部機嘅音樂功能都有4星評分（最高5星）。排名第三嘅諾基亞5530XpressMusic勝在夠平，同步功能表現理想。排第四的LGBL40NewChocolate短訊息功能不俗又耐用。
至於3G手機只有一款獲推介，就係諾基亞5630XpressMusic，喺3G手機類別唯一一款得4星評級，老友話，呢部手機最啱小藍，音樂功能容易使用，音質又好。
GSM手機獲推介嘅頭兩位，分別係接收靈敏度高，操作方便嘅諾基亞6303classic，以及各項測試表現平均又耐用嘅三星GT-S3650Corby。