甘威舊年向女助理求愛搞到一身蟻，面臨立法會調查，回頭是岸都係老婆緊要，新年兩公婆與黨友到非洲埃塞俄比亞旅行，全程冧爆老婆，箍煲成功。
八方喺甘威個blog見到佢兩夫婦糖黐豆合照，甘太亦重現甜蜜蜜笑容。所以話呢，支持老公從政都有個好處，就係大把人幫手實個佬。掂老婆黨友都有功勞，情人節當日，同行嘅張文光特別安排由AddisAbaba空運玫瑰花到BahirDar，團中女士人人有份，喺非洲都收到紅玫瑰，冧到暈啦。
家庭和諧，甘威噚日好風騷咁話都有送禮物畀太太，又話太太近日迷上整甜品，遲啲有機會可以邀請記者試試太太手勢。你哋咁甜，八方驚其他人睇見怕滯喎！