數碼世代，傳統事物落入邊緣困局，從小學會的寫字功夫已被打字取代；電子書出籠，印刷書命運堪虞。惜書人宋漢生一手創辦網上書櫃，雖然，用戶在線上分享讀後感，他卻愛用筆眉批留痕，近日更邀請網民回歸基本用手寫，讓歪斜字體落在紙上才最可愛。
記者：蔡俊業
攝影：陳盛臣
Profile
30歲，於美國密西根大學主修經濟學及政治學，2003年畢業回港後曾在購物網站YesAsia工作，曾是《蘋果日報》專欄「蘋果批」作者，於2005年創立網上書櫃aNobii，現時用戶達40萬，收錄書籍達千萬本。
兩星期看一本書
恕小記孤陋寡聞，訪問前對宋漢生（Greg）名字毫不認識，翻查資料才知道來自書香世家，爺爺宋郁文生前是《成報》主筆，又曾在珠海書院和樹仁學院（現樹仁大學）新聞系任教；父親宋韶光更是著名風水師，美國伊利諾州大學歷史系研究所碩士，小時候過新年在無記總見其影蹤。兩輩皆愛書，Greg自小在此環境下長大，讀書和藏書都是理所當然。「我諗屋企最多嘅就係書，幾幅牆由地下冧到上天花板，好誇，老竇教歷史，爺爺亦研究歷史，所以佢哋有好多線裝書。去到人哋屋企，先發現唔係個個都咁鬼多書。」
那時，他最愛看奇趣書籍，「即係講非洲有人條頸20呎長，或者有12隻腳嘅雞嗰類書。」還有IQ題和愛迪生等圖畫名人傳記。轉眼20多年，Greg由美國大學畢業回流，看書的心從沒變，而且胃口頗大，「平均兩星期睇完一本。」涉獵也廣，由講述2008年金融海嘯來龍去脈、AndrewRossSorkin的《TooBigToFail》厚甸甸近600頁的「磚頭」書，到東野圭吾的推理故事也感興趣。他說，現時每月至少花$600買書，最愛到amazon血拼。當然，也多依靠他的親生仔──網上書櫃aNobii，「有時可能係亂行見到個封面幾次，可能係真係值得睇睇。」
睇書如着牛仔褲
話說有次逛PageOne，遇見一本很好的書，覺得全香港不會只有他看過，很想認識看過這本書的人，於是決定建立aNobii，大家只須輸入國際書號（ISBN）便能夠找到書，也藉寫書評尋找同好。以為Greg都是那些只在網上發表讀後感的人？非也，「除非有一本書有好強烈意見，好想推介，就會在網上寫書評，否則都係寫落本書度，或者用摺頁同螢光筆記低，可能係以前讀書嘅習慣。」老實說，小記也愛讀書，但更錫書，「到處留痕」實在不行，可Greg不一樣，「我好鍾意畫花，唔係特別錫書，我覺得本書越殘，就越係擁有本書咁，我諗有啲似着牛仔褲，你着到爛，好Distinct係你。」
仲講寫字？
近日，意大利筆記簿品牌Moleskine推出專為讀書人而設計的筆記簿，Greg覺得概念過癮，在aNobii向用戶發出英雄帖，把讀後感寫在筆記簿上，Crossover網站和實體紙筆，「我覺得幾有趣，因為好耐未試過見到人哋寫嘅字，就算有人用NotebookJot低，都唔會睇到。」收到網民的作品後，和他預期有何不同？「我覺得唔係太花喱碌，仲分到男女，係正經或者係豪邁，個人（寫字的人）立體咗。睇書係好Revealing，反映你大概係咩人，再加一層就係你寫嘅字，會更加過癮！」究竟Greg會在這本筆記簿上寫甚麼呢？原來，已經決定寫四本書，並擺放在展覽中，而篩選標準竟然是幻想自己一個人流落孤島！
Greg'sChoice 四大札記
1.《FooledbyRandomness》NassimNicholasTaleb
「名著《黑天鵝》（BlackSwan）作者，佢一腳踢爆，我哋嘅缺陷就係明明無因果嘅事，都會夾硬話有！呢本書同我平時睇嘅嘢好唔同，我會想用嚟Remind自己，質疑自己嘅想法，好似有支針拮我！」
2.《AShortHistoryofNearlyEverything》BillBryson
「故事性強，好幽默，例如地球幾重同幾圓，係點樣磅同點樣度出嚟？每次睇同一個笑位我都會笑，硬係要帶本百科全書，我就會帶本好好笑嘅百科全書。」
3.《從前》董橋
「故事性強，每次重睇都好似由頭睇，好似新睇咁樣，好有趣，文筆好正。佢寫番以前嘅年代，戰前戰後，對我嚟講好遠，但又會覺得當時嘅情節好睇，好有投入感。」
4.《俗》黃偉文
「有一篇講佢SearchGoogle，唔知搵咗啲量度單位，寫咗篇幾好睇嘅散文出嚟，（《剎那空虛恆河沙》），揭吓揭吓喺書局睇晒！本書有種香港味道，董橋係遙遠嘅香港，呢本就屬於我個年代嘅香港。」
閱讀品味展覽
意大利筆記簿品牌Moleskine，將推出全新系列MoleskinePassions，共分六個主題：書籍、電影、音樂、食譜、健康生活及酒品。今次與宋漢生的aNobii合作，正是配合全新產品問世，將在亞洲12個城市中的40個主要零售點展出，包括台灣誠品書店，而香港展出地點有：city'super、PageOne、Dymocks等。
音樂：本地設計師ToreCheung，將剪貼玩到盡。
閱讀：專欄作家羅維明，以文字配合插畫。
食譜：有歐陽應霽教你煮蛋。
