市況陰陽怪氣，結算後仍未有方向，散戶唔敢入市，成交純係左手交右手，塘水滾塘魚，一夠3點鐘又係㩒掣沽貨，特別係趁好消息出貨。京信通信（2342）盈喜後出射擊之星，明明靚到暈增長1.8倍嘅361度（1361）出業績後急回散水。大市升跌難估，反而係即市炒家嘅天堂，昨日輪場成交創08年7月以來最多，佔總成交兩成一，但識炒波幅嘅人唔多。
聽講輪場其實旺丁唔旺財，炒鬼根本唔肯坐過夜，每日只係追逐幾格嘅利潤，所以成交至咁活躍。輪商沽唔到貨，反而益晒經紀，有行以5蚊佣做招徠，實行密食當三番。散戶可能奇怪點解市況低位挾升，手上持倉嘅賺幅唔多，甚至唔少仲係蟹緊。因為挾升市時往往扮勁，一係全日冇波幅引人高追，一係好消息配合出貨。引死人嘅虎頭蛇尾最佳例子係國藥控股（1099），即市波幅夠，卻每逢收市「龜縮」，又唔跌得多，結果第二日挾升，冇定力嘅飛身買入，周而復始。所以老散即使睇好，都唔好心急喺開市冇耐買入博炒即日鮮。
蜆売望多兩眼
咁嘅現象不難理解，內地1月新增貸款萬四億人仔，市場估受收緊根銀措施影響，2月最少收窄至6000億，手緊局面已充份反映於市況——大市升整體成交縮。短炒難度唔細，但整體大市波幅已明顯收窄，似係等緊3月嘅兩會同下周滙豐控股（005）嘅消息。上定落鬼知咩！唔好估頂估底跟勢做密密食最安全，近日嘅滙控就係好例子。
趁悶市同大家做吓「青心直說」大事回顧。去年12月寫過蜆売電器（081），股東終於通過中國海外（688）以高溢價收購佢旗下嘅光大地產。當時大股東提出以每股1.8元，向小股東收購本業風扇家電業務；另中國海外會以每股5元向蜆売提出全購，合併代價每股6.8元，比停牌前有82%溢價。
中國海外除咗睇中光大地產嘅廣州中信廣場、上海光大會展中心、北京光大國際中心等優質項目，亦係為重組鋪路，母公司有機會將二三線城市資產注入做上市旗艦。蜆売復牌冇異動，未來走勢要等阿爺出招，老散大可睇定啲至出擊。
胡孟青