中電控股（002）噚日公佈09年業績，舊年8月因為患上乳癌而要休息嘅「中電鐵娘子」、中華電力副主席阮蘇少湄終於復出，上個月佢開始返工，噚日仲現身業績記者會。剪咗個「冬菇頭」嘅阮太，雖然放假休養咗接近半年，但睇佢答記者問題嘅表現，同對公司資料嘅掌握，真係唔講都唔為意佢放過長假噃！不過，佢似乎唔係好想講私人嘅嘢，所以聽唔到佢講吓抗癌經歷。
中電要員同華華講，阮太係喺1月正式返工，但始終都係大病初癒，所以就冇好似以前咁拼搏，唔再係日日準時朝早九點返工，唔好以為佢偷懶，佢就算喺屋企都會「啃」晒所有文件o架！而中電所有重大決策，阮太都有份參與，副主席呢個職位絕對唔係掛名。
參與重大決策 副主席非掛名
作為中電百年老店第一位女常務董事嘅阮太，喺舊年8月申請休假醫病，佢患嘅係乳癌，好彩發現得早，吉人天相，終於大步檻過。但始終身體要緊，為咗減輕阮太嘅工作壓力，中電喺上個月升咗藍凌志做中華電力常務董事，阮太就改任副主席，負責重大決策。
現年51歲嘅阮太，喺99年加入中電控股旗下嘅中華電力，並喺02年升做常務董事，成為香港「兩電一煤」中罕有嘅女性高層，多年來同政府就准許回報進行周旋，最為投資者同市場樂道。
華華喺度亦祝阮太身體健康！
李華華