新款DC開始玩傾斜，估唔到連電視都搞呢科嘢！SONY新發表的BRAVIALCDTV也來傾斜6°，據稱咁樣係為配合人體工學，令用家睇得更舒適；新機還配備上網功能，勁睇網絡電視、又玩小工具Widgets，睇嚟往後電視趨勢都係咁玩法。
記者︰陸俊雄
攝影︰梁細權
金屬底座
SONYBRAVIA貴過人、但亦引死人！日前發表新一代BRAVIA亦無死錯人！新NX系列分為800和700兩款型號，簡潔如純黑玻璃機面，配鋁金屬底座，驟眼望落靚似一件藝術品；而實際功用是令屏幕微微向後傾斜6°，這與玻璃反光及可視角度有關，而且有專人研究過，咁樣可以令用家睇得更舒適，畫面表現亦更出色。
基本功能包括LED背光燈、Engine3影像處理器等；當中最勁係熱能感應系統，佢唔只一般光暗自動調節咁簡單，每當你離開屏幕正面範圍，畫面會自動關上，但仲會繼續有聲，到你返埋「皇帝位」，畫面又會再亮起，聽落好環保。至於800和700系大不同處，是200Hz和100HzMotionflow之分別。
網台任睇
齋玩外形當然唔夠，新BRAVIA還加入InternetVideo，美國嗰邊早已有玩，係時候到香港等亞洲地區。新BRAVIA可利用無線或LAN線上網，睇網上視訊頻道。基本上一買機就包你睇16個外國頻道，YouTube係其中一個。鬼佬嘢唔夠同聲同氣？放心！SONY已和本地數間傳媒合作，例如本集團的VDONEXT都在其中。平日上網睇開《數碼達人》或《私家廚房》，以後可用大電視睇；不過講緊最小32吋電視才內置此功能，睇嚟各大合作夥伴搞呢類網上節目時，真係要走入全高清拍攝，如果唔係拉大畫面一定起格。
下載小工具
另外，新BRAVIA仲學似手機咁，可下載有用Widgets，例如天氣、股價、Facebook、Twitter，就連世界盃Countdown都有。佢會有一個獨立介面，俾你擺放呢類常用小工具，仲要係你鍾意點砌都得，概念跟手機基本一樣。講咗咁多，好有吸引力吧？3月1日至17日開始，40吋NX800套裝率先接受預訂，有不同組合，可以係跟底座或跟掛牆架，然後配專用Router，或PSPgo和PS3120GB主機，價錢介乎$19,880至$21,080。
查詢︰SONY（23452966）