一日接到三封讀者電郵。一位ThomasChan來郵說：「意大利經濟三十年來未好過，人民平均月薪係一千二百五十歐羅，好窮。
但香港的經濟十三年來（自97年起）都未好過，人民平均月薪係一萬元港元，人哋好窮，那麼我們不是更加貧窮嗎？歐羅現在做緊10.588」
香港人嘅平均月薪應該唔止一萬港元，應該與意大利平均月薪差不多，1250×10.588即港幣一萬三千二百三十五元，但意大利生活費貴過香港，香港有差不多一半人口住在公屋，食物遠比歐洲便宜，以此推算，香港人不會較意大利人更加貧窮，治安方面，香港好得多啦。
另一位讀者何先生來郵云：「本人追看《蘋果日報》〈名采〉多年，亦為貴專欄讀者。牛年年初看貴專欄寫屬龍人士該配帶鼠圖銀牌物件，所以依足指示，還配帶夠兩個。牛年果然鴻運當頭，工作上很多困難都一一克服，得到很大進展。
望今年左丁山先生亦可百忙抽空在貴專欄講述流年生肖趨吉避凶之良方，打救迷途或迷信人士。」
流年犯太歲戴太歲牌一事，往時全靠梁玳寧轉告傅會長指示，今因梁玳寧仙遊，左丁山一時之間未能與傅會長見面請教，所以今年唔再講。往年到車公廟求籤，知道廟內有周生生攤位賣太歲牌，何先生如有需要，或可一試。
又有讀者偉仔來郵唔知講笑定講真：「首先祝你新年萬事勝意，身體健康！客氣嘅說話不多說，本人呢幾年可說倒霉之極，生意做到關門大吉，打份工，想搵多個錢都無，股馬更是輸到直，買馬明明二選一都可以選錯，更甚是選中也會遇到馬會網上投注出問題而沒有派彩。拜讀貴專欄，知道先生熟知命理，現唐突請求，可否介紹一有料之命理師給我呢？不要太貴！哈哈……」
偉仔如果真係咁運滯，不如修心養性，努力做好你份工，放工就返屋企讀書自修，冀求知識增值，無謂搵人算命睇相嘞，如果你真係要搵，《蘋果日報》娛樂版咪大事報道過風水師李丞責憑術數算中三Ｔ，與兄弟不和嘅，你咪問吓娛樂版點樣搵到李丞責囉，不過佢唔會好便宜嘅噃！