財經事務及庫務局局長陳家強，噚日同傳媒春茗嘅時候，除咗講新出爐嘅財政預算案，佢仲喜孜孜咁同大家介紹暢銷書《Toobigtofail》，呢本書以小說形式講述美國雷曼倒閉事件，情節豐富，陳局長形容，好似睇緊電視劇《24》咁精采，睇到瞓唔着咁話。
暢銷書講雷曼倒閉
睇完本書，陳局長下星期就可以親身去美國感受吓美國嘅經濟環境嘞，事關佢下周三就會飛去華盛頓同紐約，同聯儲局主席伯南克、美國證監會及交易所等財金高層會面，了解當地情況，又介紹香港點樣處理今次金融危機；之後佢會飛去加拿大多倫多同港交所（388）主席夏佳理會合，一齊推銷香港呢個上市平台。虎年伊始已經驛馬星動。