新城財經台噚晚慶祝成立九周年，唔少財經界高層都有畀面出席，好似九倉（004）副主席吳天海、東亞銀行（023）顧問陳子政等，但係要數全場最矚目，首推人稱「樓神」嘅長實（001）執行董事趙國雄，風頭勁過財經台女主人馬健生。
雖然唔使推銷長實樓盤，但樓神一樣悉心打扮，全身白色中山裝，頸繫粉紅色印有中國字嘅頸巾，加上一副黑超，一出場，相機嘅閃燈就閃個不停，佢仲同馬健生嚟個熱情擁抱，集團同系姊妹機構，梗係多幾分親嘅！
原本同場仲有一位久未露面嘅紅籌之父梁伯韜，但到8點入席開場都未見蒲頭，唔知係咪入股意馬（585）之後多嘢做太忙呢？
李潤芳攝