任達華和吳君如合演羅啟銳執導的電影《歲月神偷》，在柏林影展勇奪水晶熊獎。港府冷落的集體回憶，如今在他鄉大放光芒，父母輩的傳統價值觀，也只能在片中尋。
戲中演鞋匠夫婦的任達華與吳君如，憑《歲》片分別角逐香港電影金像獎最佳男、女主角，華仔更表示會為君如做一對靚鞋，希望她在明日首映禮穿着。撰文：何永寧
港產片《歲月神偷》揚威柏林影展，故事說的是舊一代的香港情懷，任達華大讚此片是一齣難得的電影，叫大家不要相信金融產品。
華仔日前接受本報專訪時說：「點解全世界變咗提款機，俾人拎晒所有錢？所以最實際嘅事最好，家研發好多新產品，但已經冇60年代嘅價值觀。」
「寧放錢喺銀行」
問華仔如此感慨，是否在金融海嘯損失很多？他說：「就因為我有60年代嘅價值觀，所以我完全冇跌過，反而有增加，我係稍為幸運嘅一個，我係個傳統嘅人，寧願將錢放喺銀行，唔會高投資。」
華仔表示投資最多是皮鞋、皮帶和領呔，最貴一對鞋訂做了18,000多元，他說：「我諗已經儲咗300對鞋，買咗一個5,000幾呎嘅貨倉擺放衣物，老婆同個女嘅嘢又多呢。」
吳君如則謂自己是個好狠的人，不用的東西和不穿的衣物會丟掉，因為都是身外物，她說：「其實我都幾似一個男人，有時丟得比男人更狠，因為我好怕霸佔住啲地方，寧願送畀人，買個貨倉仲貴啦。」君如擁有200多條牛仔褲，但很多都不會再穿。問她丟東西後，試過後悔嗎？她笑說：「唔會，從來都唔會後悔，我做事好心狠手辣，死不回頭。」
華仔在戲中要為君如做鞋，他表示花了一星期時間學做鞋，但很快便上手，可能他先天很喜歡皮鞋，他說：「如果一對鞋好，着住好似腳底按摩，我家都有幫太太同個女做鞋，希望趕得切幫君如做一對，送畀佢首映當晚着。」
「要獎金好過啦」
君如表示今次第一次飾演媽媽角色，發揮甚大，問她可有信心在香港電影金像獎中再奪影后寶座？她說：「我冇諗。」
問君如仍然恨得獎嗎？她想了一會說：「我想攞獎金多啲，部戲可以保持住賣得，片酬可以升，要獎金好過啦。」
吳君如髮型：RoyFanofAslow
吳君如化妝：MidcoChu
場地提供：中環Cicarro