揚州無揚州炒飯，同樣地，農夫車你又幾時見過香港有農夫揸？咁又點？型過人就自然有Fans！粗獷外形加個性鮮明大尾斗，就變潮人之選。三菱L200Sportero喺香港賣嘅係另類型格，專冧愛上山下海嘅型人，家只要加四萬幾蚊,更可加裝一系列原廠配備，再谷型格。
記者：趙慧敏
攝影：梁細權
Model：Vanessa@PureModels
轉型更搬得
提起近年大熱Pick-up，怎少得L200Sportero的份兒，與傳統外形硬朗的Pick-up有別，L200Sportero偏向流線型，外形具時代感，只是車斗偏細，但運載量依然不少，要物盡其用當然不成問題。今次代理就引入一系列配件，除令外觀更添動感，搬運能力亦相應提高。升呢版L200Sportero這天孭住獨木舟及碳纖維單車出現，強推運動形象，沒想過Pick-up都可以咁玩。裝上頂架及底坐架的L200Sportero，果然型格得多，大大隻獨木舟及單車並排擺放車頂，幾壯觀！咁高調，人人都知你夠Sporty。而車斗都無被遺忘，加上了保護膠墊，放戶外活動的架生，都不怕把車弄花。
加料潮升呢
要提升型格，當然還有板斧，頭冚保護擋可令車輛在高速公路行駛時避免被石仔彈花車冚，還有前泵把金屬保護架及前泵把保護底板，作為助你賣弄個性的拍檔，固然要好好呵護。這個年頭，電鍍裝置永遠有市場，幾件上身，成部車即時潮升級，今次L200Sportero就在門邊手把和油箱蓋着墨，讓它們在陽光下一閃一閃，的確頗有型，還有不得不提這加料套裝更包括換上合金胎軨及大腳八18吋厚身車胎，令整部車更顯氣勢之餘，亦增加其越野味。今日現身的這款是SuperSelect版，本身已配備電鏡、天窗、恒溫冷氣及MP3音響，配備的級數媲美房車，加上2.5升柴油Turbo引擎，再有四前速自動波箱同手波任你選，當然，柴油車已再不是獨沽一味的手波年代了！
規格
引擎：2,477cc直四柴油Turbo
馬力：136ps/3,500rpm
扭力：32.0kgm/2,000rpm
傳動：四前速自動波四驅
售價：$329,000
$289,000（手波版）