鄉議局為沙田石門新大樓籌款十分頻撲，早前發叔親自向各大孖沙募捐，最近又有喜訊，華人置業大劉應承捐錢，但講金前要先談心，大劉話想多了解鄉議局角色同功能，所以派出阿囝劉鳴煒同鄉紳見見面。
前日鄉議局中人就喺發叔帶領下，拉大隊同劉鳴煒會面。有與會者話，劉鳴煒見到鄉議局咁大棚人到訪都有點驚訝，亦可能估唔到發叔親自出馬。據講劉鳴煒對鄉議局工作非常感興趣，不過講完一大輪，佢都冇講會捐幾多錢，相信係要等老竇揸主意。發叔透露同大劉都算有交情，認為大劉十分有誠意捐錢，自己又點可以唔親自上陣？無論大劉最終捐幾多，鄉議局都無限感激喎。