摩根大通中國區證券兼大宗商品主席李晶嚟到虎年有新look喎！佢唔單止將頭髮染咗棕紅色，仲着埋套大紅套裝出席噚日喺外國記者俱樂部（FCC）嘅午餐會。
紅就係自信
有台下聽眾問佢對中國心理同市場繁榮嘅睇法，李晶話中國家作為全球準第二大經濟體，家都算係前所未有咁自信，唔信？睇睇舊年溫家寶同網民對話時候嘅相，溫總除咗用紅色電腦，仲着紅色衫o架，反映紅就係自信啦！難怪後來有其他聽眾話：「哎呀，晶，我算是知道你為甚麼穿紅色了！」惹嚟台下陣陣笑聲。
換造型當然唔等於換觀點，李晶對於今年嘅股市繼續睇淡，佢仍然認為銀行板塊同房地產板塊，會分別因為集資同流動性減弱等因素而受壓。
提到海南樓市狂飆，李晶亦現身說法，話自己之前喺三亞親眼睇到某售樓處門外人山人海，就連VIP條隊都勁長，啲貴賓嘜低VIP編號後，都係返屋企慢慢等VIP銷售人員callback。佢再三感嘆之後，惟有走去第二度逛，點知返轉頭一睇，長長嘅人龍依舊，但每平方米樓價竟然升咗成千銀人民幣，睇睇手錶，原來只係過咗半粒鐘咋！
李華華
mailto:[email protected]