連身在權力核心嘅發叔都話官不聊生，又難怪財爺鬍鬚曾一副等收工姿態，是旦求其抄番舊年份預算案又交貨，面對呢份催眠指數爆燈預算案，一般市民相信冇乜興趣，噚日鬍鬚曾讀預算案時，就出現可能係歷來最少掌聲，卻最多鼻鼾聲嘅場面。
德成局長力拒睡魔
鬍鬚曾前年首份預算案長200段，舊年收斂咗，縮短至138段，今年長氣番，有178段，鬍鬚曾花咗近1小時45分鐘先讀完，不過議事堂內好多人冇聽晒，教育局局長孫公聽咗唔知有冇10分鐘就擺出沉思姿勢，後來甚至呈「斷片」狀態，連工作人員行來行去斟水都驚動唔到佢。
其他司局長亦要死撐，民政事務局德成局長似乎忍得最辛苦，全程郁身郁勢，力拒睡魔上身；環境局局長邱騰華托實個頭先唔使瞓落枱面咋，唐公子則一味發呆。坐在公眾席嘅幾位行會成員，在召集人梁振英帶領下先後會周公去也，梁召集人頻頻放蚊，李業廣、梁智鴻索性閉目養神，佢哋兩位年紀稍大，旁人見到都唔好意思打擾佢哋，綜觀眾人，僅鬍鬚曾太太打起精神全場無休。
冇人掟蕉當堂靜晒
呢份綠色封面預算案唔派糖，原來加足料含睡意配方，少啲精神都頂唔住，公民黨黨魁余若薇撐到半場終於投降，八方見佢開始釣魚，自得其樂，至於佢同梁耀忠邊個收穫豐富啲，八方就唔知嘞。民建聯黃定光原來已練成靈魂與肉體分離神功，得以脫離呢個催眠煉獄，令人羨慕。
民建聯葉國謙果然係建制派頭領，乜事都算到社民連頭上，佢噚日話，議事堂冇咗社民連三子，大家當堂耳根清淨晒。事實上噚日會議波瀾不起，冇人掟蕉抗議，如果鬍鬚曾收聲，隨時蚊飛都嚇親人，唔怪得議員咁好瞓啦。為免再出現類似場面，鬍鬚曾將補選開支同預算案「綑綁」，讓社民連重返議會，真係有先見之明而且好明智，明年預算案最好預留款項供議員買鬧鐘，為人為己，呢啲錢唔慳得。
mailto:[email protected]