傅穎（Theresa）同楊愛瑾（Miki）噚日都以低胸裝上陣，到尖沙嘴出席護膚品活動。Miki話做咗少少手腳先至會有突出嘅效果，佢話：「我本身有少少（胸）啦，又加咗少少，都係pushup啦，因為着呢條裙一定要有啲線條。」
傅穎今年蜜運
以白色低胸裙上陣嘅Theresa，因為胸口露出膠紙邊所以不時以手掩胸，佢都大讚Miki身材一向有睇頭，佢仲好謙虛話滿意自己身材：「大家睇住我大，我有幾多大家知啦。」Theresa早前去台灣學跳舞，佢強調冇搵緋聞男友敖犬，仲叫大家唔好再講呢單緋聞，因為相士話佢今年會遇到真命天子。
另外，Theresa前晚到中環出席活動，佢一到場就問大家覺唔覺佢瘦咗好多，話家每日都上兩堂跳舞班，因為佢嚟緊會轉型跳舞唱歌。
嫌走音話題悶
問Theresa擔唔擔心又唱又跳會走音時，佢話：「唔理呢樣嘢，亦唔會刻意去諗，你哋寫得太多，自己都好耐冇唱歌，一路都講呢個話題好悶。」佢仲強調自己又唱又跳唔係想分散大家對走音嘅注意力，只係想畀啲新鮮感大家。