財爺每年例行公事諮詢政黨對預算案意見，公佈預算案後，慣例會回覆議員接納咗多少項「派糖」建議，好讓議員向選民邀功；為咗環保，近年財爺辦公室會將回覆燒成光碟畀議員，今年卻忽然復古，竟然奉上一隻史前文物3.5吋floppydisk磁碟！
湯家驊：財爺扮窮
公民黨湯家驊噚日拎住隻磁碟慨嘆：「我屋企有三部電腦，但冇一部係讀得到隻碟！」近年買電腦基本上已冇3.5吋磁碟機，喺市面想買隻floppy都唔容易，千禧年以後出世嘅小朋友，恐怕唔知乜嘢叫做floppydisk咯，估唔到財爺咁懷舊。湯家驊質疑財爺扮窮，「唔知係政府窮到要循環使用呢啲冇人用嘅嘢。」同樣收到一隻磁碟嘅民主黨，面對呢隻文物級嘅磁碟都一籌莫展，事關全個辦事處僅得一部電腦有3.5吋磁碟機，由於電腦年事已高，讀唔讀到隻碟，聽天由命。財爺今年撥款資助低收入家庭買電腦同上網，唔知有冇預留款項自己換新電腦，或者撥款畀議員買舊機讀隻floppy呢？