每逢春節，各大中小型商會都會搞新春酒會聯絡感情。舊年由於董事禁售期一事搞到全城富豪界熱烘烘，令到唔少藍籌公司都加入嘅香港上市公司商會，噚日就喺中環美國會舉行新春酒會，之不過，華華在場所見，冇乜大藍籌猛人出席，最捧場嘅莫過於政府一班財經界高官同監管機構高層，政府代表有財經事務及庫務局局長陳家強、副局長梁鳳儀、常任秘書長區璟智，監管機構就有證監會主席方正、港交所（388）主席夏佳理同埋行政總裁李小加。真正嚟自上市公司嘅，當然有上市公司商會主席兼鷹君（041）主席羅嘉瑞，內房股富力（2777）李思廉都畀面出席，搵多粒「（財）星」都難。