南華昨晚在大球場舉行的亞協盃，捉到鹿唔識脫角！面對多打兩人的優勢，在G組首場分組賽只能與泰國蒙通聯悶和0:0；足主羅傑承對球員今次放虎歸山的演出，甚為不滿。
自從上季4強不敵科威特競技出現大球場爆棚盛況後，南華本季亞協盃處女作的紅海威勢確實叫人期待；可惜，昨晚只有5,725名球迷進場，雖然人數不及上次，但場內聲勢仍在、氣氛不俗。
上半場初段，南華受制於應屆泰國超聯冠軍蒙通聯的緊迫踢法，只能以「捱打」來形容首10分鐘戰況；就連場邊的擁南躉也為主隊打氣：「不要給人反客為主！」幸好經過適應後，少林兵終重拾主場優勢。
羅傑承：發揮差勁
南華前鋒里奧在22分鐘策動反擊，接應梁振邦傳中後施展獅子搖頭，可惜太正關係被泰軍門將沒收；3分鐘後南華在前場獲罰球機會，助攻的陳偉豪有角度的頭槌攻門，但被門楣所擋，南華上半場未能領先確實欠運。
換邊後南華繼續發揮主場優勢，每當蒙通聯球員觸球或犯規，加路連山道附近一帶都會聽到噓聲；戰到60分鐘，蒙通聯的皮亞察因阻延南華開罰球，遭南韓球證李文厚送上第二面黃牌，兩黃變紅出場。想不到14分鐘後，其隊友柏路邦未有吸取教訓，粗野欄截多次門前失機的里奧，被球證直接紅牌驅逐離場。
可惜南華未能把握以眾凌寡優勢，賽和0:0，被這支譽為同組實力最強的球隊保住清白之身，作客取得寶貴1分；南華足主羅傑承賽後面露不悅，更點名狠批球隊中堅沙域臣：「發揮差勁！不明白教練如何訓練體能，球員今仗疲態畢露。」
大埔作客新加坡和1:1
另外，大埔昨在亞協盃H組作客新加坡的芽龍聯，憑前鋒安基斯的入球，以1:1賽和對手。
本報訊
亞協盃昨日部份戰果
《G組》
南華0:0(0:0)蒙通聯(泰國)
佩西瓦(印尼)2:3(1:0)VB競技(馬爾代夫)
《H組》
芽龍聯(新加坡)1:1(0:0)大埔
泰港(泰國)2:3(1:1)峴港(越南)
註：前者主場
《花絮》
陳七拖女友撐場
南華前鋒陳七（圖右）隻黃金右腳仲有傷，上禮拜日情人節喺日本為港隊打東錦賽已經冇得落場，噚日繼續冇得打亞協盃，但就搵埋女友入場做座上客支持「少林寺」，認真抵讚！
泰國球迷得10幾人
泰國蒙通聯噚日作客嚟香港比賽，雖然冇火辣辣嘅女球迷吶喊助威，但假假哋都係泰超冠軍，都吸引成10幾個泰國球迷入場為同胞打氣，又有國旗又有搖鼓，球隊最後打少兩個都冇輸，算有個交代啦！
貴價套票銷情麻麻
南華上年喺亞協盃4強次回合就成功令大球場變成紅海。不過，噚日只係分組賽，即使對手蒙通聯係「泰版南華」，都吸引唔到太多球迷入場，據足總職員透露，睇足3場主場分組賽嘅$200套票，賣到噚晚開賽為止都係銷情麻麻。
少林兵又成大贏家
足總噚日出咗下個禮拜三，港隊主場對也門嗰場亞盃外嘅名單，雖然南華陳七有傷冇入選，但20名大軍當中仍然有8個「少林兵」，兄弟球隊嘅飛馬球員都有4個在陣，繼續成為港隊大贏家。
《港隊20人大軍》
門將：李瀚灝、葉鴻輝
後衞：馮啟匡、翟廷峰、陳偉豪＊、李志豪＊、黃展鴻＊、蘇偉泉
中場：徐德帥、梁倬軒＊、歐陽耀冲＊、梁振邦＊、
葉頌朗、郭建邦＊、黎耀昌、劉念溢、阮健文
前鋒：余浩邦、鄭禮騫、巢鵬飛＊
註：＊為南華球員
20人大軍今日開操，備戰3月3日在大球場與也門進行的亞洲盃外圍賽。