早上睇大行出報告，發覺啲大行專才改行做編劇肯定寫得一台好戲。點解咁講，佢哋唔單止可以用一個報告睇死港交所（388）1個月表現，更可以將死拗翻生，寒冬過晒至推介波司登（3998），唔係收齊貨就奇。
剛喺新鴻基地產（016）「高價」投得將軍澳地皮後，7間大行齊發報告大合唱，清一色大讚市道好，發展商識貨，單睇YOHOMidtown賣個滿堂紅，比市面二手樓價高35%，就知唔怕買貴地。電視新聞紛紛出現業主封盤反價盛況，加價兩成都唔聲震。行內人都知，好多時電視台一早叫代理搵定業主做訪問，「業主」梗會通氣盡情做「聲演」。
講番大行點睇樓市，話說新地YOHOMidtown可以賣貴同區咁多，係因為可以將平地變豪宅。其實點解一手樓嘅樓價要同二手樓比？一手樓貴係賣緊新樓嘅溢價，而二手樓要視乎樓齡同位置，都有好大分歧。點樣比已經唔重要，要股價升只要資金同概念配合，但投資者要留意財政預算案有冇打擊樓市措施。賣地唔跌、期指結算前又用地產股挾升，小心施政報告反高潮。
「博派」力吸滙控
另一個令人期待嘅高潮係下周一滙豐控股（005）業績，仲記得08年金融海嘯供股減派息，令09年頭3季只得8美仙？記唔記得好市時，滙控季息同末期息係幾多？06年係15同36美仙、07年係17同39美仙、08年係18同10美仙。09年派咁少，但業績好番咁多，2010年唔會少過03年沙士嘅12美仙啩。若果派息真係加到正常06年78美仙咁，息率就近7厘，唔怪得近期無論輪場或專業投資者，都「博派」再現，博佢回應股東共度時艱嘅心意，大派特派。
重申我唔係滙控股東，亦唔想對已持股或已供股者有甚麼指示，最近有周刊記者失驚無神未預約就帶埋攝影師殺上電台，等我一出直播室就舉機突擊訪問，係極度無禮貌行為。滙控業績未出數據欠奉，我唔需要為博出位回應任何無禮嘅追訪，亦毋須扮滙豐代言人咁戇居，就算讀者唔覺得老土，我都覺核突。
胡孟青