2009年嘅年報一登場，華遠地產舵手任志強今年初即刻喺「中國房地產行業上市公司高管薪酬排名TOP100」榜上有名，以707萬蚊人仔嘅高薪拎咗個亞軍。自此，任志強嘅電話就響個不停。佢仲喺博客度爆料，話自己被央視「多位女性分別來電、連續進攻」，故被迫出嚟解畫，仲連前總理朱鎔基（圖）都要搬出嚟做擋箭牌。
講課費多過人工
任志強係民企老闆，人工又關朱鎔基事？佢話自己已經10年冇加薪（當時仲係幹部級員工），薪金亦分兩部份，包括實質同名義工資（後者跟業績掛鈎），自己嘅實際年薪根本冇70萬人仔咁多，仲話工資呢回事係15年前嘅舊聞，當時薪金要經中紀委書記兼北京市委書記尉健行盤問，再上報國資委審批，連朱鎔基都曾專門為此批示、蓋過紅章。任志強實際到手嘅人仔，連公佈年薪嘅十一分之一都冇，佢講笑咁話，講課費仲多過份工資喎！