正與癌魔抗爭嘅支聯會主席華叔，下個星期日2月28日79歲生日，雖然佢抱恙在身，但一班老友、擁躉決定搞大佢，事關虛齡計華叔正好80大壽，正所謂「男做齊頭，女做出一」，因此今年更加大條道理大搞，同時為華叔冲喜咁話。
華叔80大壽宴會由教協中人統籌，喺華叔「飯堂」旺角仕德福酒店陶源酒家舉行，據講最少擺十幾圍，除咗請晒一班同華叔喺教協合作幾十年嘅老朋友外，華叔嘅學生都會到賀，有人更練定歌為華叔祝壽。華叔以前不時同朋友打麻雀，如果當日佢有興致，八方聽聞好多人十分樂意做麻雀腳陪華叔攻打四方城。
民主黨方面，大年初三由主席何俊仁、副主席劉慧卿、單仲偕連同中委楊森做代表去華叔屋企拜年，星期日更加會拉大隊去賀壽，黨團召集人、幾次拍住華叔參選嘅李華明話會同九龍東支部兄弟一齊到場，祝賀呢位九東元老，佢透露每人已經夾咗500蚊做壽宴費用兼買禮物，至於買咗乜嘢禮物，佢話要保持神秘感，畀華叔一個驚喜，暫時不便公開。
下星期一第三次化療
華叔早前公開露面時面色紅潤，精神不俗，下星期一會接受第三次化療，醫生叮囑佢要小心保暖，否則受感染就手尾長。據知華叔近日大部份時間留在家中休息，養足精神準備出席星期日壽宴。
華叔早前承諾必定會出席今年悼念六四活動，今個星期日舉行嘅渣打馬拉松，支聯會都有特別「節目」為華叔賀壽。支聯會今年印咗一批印有「平反六四．越走越近」字樣嘅T恤，部份參加馬拉松嘅支聯會成員或支持者，當日會着上呢件T恤跑步，象徵八九民運團結精神，一齊向爭取「平反六四」目標前進。
其實多個支聯會成員上月底已穿上呢件衫為今年「毋忘六四」長跑進行試跑，今年「毋忘六四」長跑於4月25日舉行，全長21公里，象徵六四事件21周年，同時迎接「辛亥革命」一百周年。
mailto:[email protected]