RPG極耗時間，所以最適合無拖拍、工作唔忙嘅人玩；唔公平？好彩，仲有手提機！呢隻《四狂神戰記》，係以九十年代經典RPG為題材，而且玩法仲與時並進，由指令選擇，改為即時Free啲動作操控，搭車等女朋友時可以把握時間升呢，我部NDS終於有Game玩喇！
文：阿洛
原作班底回歸
聽見《四狂神戰記》，係咪覺得有似曾相識？17年前（都好耐喇，80後都應該聽過），在1993年由TAITO製作，並喺超級任天堂上推出；之後再喺95年推出第二集，難得今次由大量當年製作班底重新開發，仲係由有名氣嘅SQUAREENIX作發行，應該都吸引到將部NDS封塵嘅機迷抹吓部機。
而今次除咗係由舊版2D變成新嘅3D畫面之外，超級意外嘅係雖然NDS機能有限，但隻Game個Opening就貫徹SE作風做得好靚，唔信上官網睇過先講嘢吖！
靚仔索女變豆釘
叫得四狂神，又係人神大戰嗰類啦！從前有個計劃破壞世界嘅神叫Gadas，佢做盡小動作令國家與國家、甚至係人與人之間產生不信任，而唔信任對方就梗係要武裝自己；隨住各國間戰事力量越趨強化，大戰氣氛相當濃郁。而靚仔主角，就梗係要出發去阻止奸神得逞。
講到主角，呢隻Game好吸引人嘅就係人設，男主角Maxim玩火又夠靚仔，女主角玩冰晶又係索喎，就連牛仔裝扮同向你飛緊吻嗰兩件配角都絕對係型男索女，雖然玩緊時都係變Q版格仔豆釘，但打機老手，唔多唔少都會明白幻想係美麗呢個道理。
場景親切好念舊
有咁耐歷史，古仔好懷舊，場景設計仲好有親切感，淨係封面個老翻天空之城都夠夢幻啦！不過，玩法就大不同，舊版係傳統指令式RPG，新版就係動作RPG，即係自己邊行邊㩒掣好Free咁打敵人，即係有啲似薩爾達嗰隻，個人就好Buy喇，尤其是出喺用嚟消磨時間嘅手提機。而呢隻Game亦都善用NDS雙畫面，裏頭不乏巨型誇畫面頭目，都幾有氣勢，而且仲支援篤篤操控，遊戲性自然大增。
Profile
遊戲：《四狂神戰記》
主機：NDS
類型：RPG
發行廠商：SquareEnix
人數：1人