包括高登討論區在內多家互聯網服務供應商成立「網上服務供應商聯盟」，由於疑似與民建聯有關，好多網民質疑高登被「河蟹」又狂轟，高登管理員團隊噚日發表長達逾2,500字嘅聲明，重申會保持絕對政治中立，亦絕不會加入任何政治組織。
聲明話如果只係為咗搵錢，其實佢哋唔使設討論區，只要供BT種子和三級相片、影片伺服器便可，不用冒着做不孝子、被改圖風險，對於網民批評，聲明諉過傳媒「胡亂猜測報道而引起。」聲明又指如果大家真正愛護高登，千萬小心唔好成為任何人士或組織利用來打壓高登嘅工具，如果admin真係做出收緊言論自由嘅事，「相信高登亦會隨之而消失。」高登友近日以一人一post插admin，有人甚至一人多post，聲明指咁做影響討論區運作，警告網民日後絕對只限每人一post，否則會被永久停用賬號不作事先警告。