溫和民主派搵人大常委范太搭橋同阿爺傾政改，喺中央吹「和風」大氣候中，范太稱樂意做傳話人。已退下來嘅前人大常委曾憲梓對此有另一種睇法，佢噚日同八方講，多年來民主派從未搵過佢幫手傳話，忽然「釋出善意」，令人懷疑係咪真係有誠意溝通。
佢又話根據佢十幾廿年同跟阿爺經驗，香港社會嘅意見阿爺好了解，「你哋每份報紙，包括《蘋果日報》，中央部門都有睇，市民嘅心聲同意見中央都知道，因為我去過佢哋地方，睇到有《蘋果》。」
曾憲梓又話上面有無數人專責研究香港傳媒聲音，泛民根本唔使靠人傳話，「唔使通過乜嘢人，中央都一清二楚啦。」呢番話好似有啲酸味，上面有的是人，不如都研究吓吖。