沙田陳太於新年期間與親戚去曼谷作購物遊，到埗次日早上，吃過早餐就到四面佛上香，祈福一番。四面佛乃旅遊聖地，數十年如一日，人潮洶湧，想留耐啲都好難，拜過之後，坐的士到唐人街耀華力路買手信，但見整條耀華力路掛滿紅色橫額，盡是吉祥語，充滿唐人新年氣氛，陳太話：「呢股新年味道，香港失去已久！」
行吓唐人街，就可知道泰國「後進」（唔敢話落後）一面，介乎石龍軍路與耀華力路有一條極長橫巷，有兩至三條街咁長，橫巷就係一個街市，女人梗係鍾意見識吓嘅，陳太一行入去，就冇得行返轉頭，畀人群逼住向前行，橫巷兩旁滿是乾貨、濕貨，如有火警發生，都唔知點可以逃生，巷內又有橫巷，有不同熟食檔，檔口上面有住宅，既黑暗又污糟，陳太越睇越怕，唯有極力向前行，出到石龍軍路，先至鬆一口氣，急忙與別人鬥搶的士，返回「先進」地方。曼谷唐人街嘅外形與內涵五十年不變，翻拍李小龍《唐山大兄》嘅話，背景仍然一樣。
何謂「先進」地方，SiamParagon是也，此商場與香港、日本最新型商場相比，毫不遜色，真是二十一世紀建築物，與唐人街不可同日而語。好多歐西人士之鍾意曼谷，就因為在曼谷可以隨時拍攝到二十一世紀商場與餐廳，又可以同時經歷一九五○年代之唐人街街市，新舊世界同時並存，而且以泰國之複雜法律與行政無效率、無魄力之情況睇，唐人街在未來五十年，都唔似會大規模重建，將會繼續成為最吸引遊客嘅「後進」地方，夠晒保育與保遺喎！
沙田陳太在SiamParagon購物完畢，坐Skytrain到四季酒店飲下午茶，有咁啱得咁蹺，碰到大人物駕到，三架大平治停低，第一架走出一位中東中年男士與男童，第二架走出三位身穿黑長袍女士，跟住一架車走出保鑣、隨從與工人，最後尾隨三架客貨車，運到行李，行李喼唔係LV就係紫色鱷魚皮喼，全部有白色膠套包住，陳太不禁興嘆：「原來中東富豪出門咁有排場，今次真係開到眼界！」（另按：中大新亞書院校友會會長陳志新來電郵告知，新亞校友會支持陳茂波校友做中大校董。據悉中大校友評議會正副主席劉世鏞、李劍雄，中大校友會、逸夫書院校友會會長梁裕龍均支持陳茂波。）