港大校長徐立之噚日聯同一班高層同傳媒團拜，八方見到徐校長身邊有個女仔跟到實，唔似港大高層，唔通好似中大校長劉遵義咁忽然有第二春？
八方諗多咗嘞，呢個女仔叫陳小靖，係台灣人，正在美國伊利諾伊州大學讀教育碩士，由於要做一個關於知名學者教學狀況研究，早前電郵徐立之請求提供協助，徐立之覺得幾得意，就安排小靖做一日「影子港大校長」，噚日同佢一齊團拜。
紙板校長供學生拍照
小靖近距離觀察徐立之工作，形容徐校長管理手法柔中帶剛，好了解港大教職員同學生，亦清楚校務政策；徐立之則讚小靖夠主動，又話以前都試過帶中、小學生去開校務會議，等多啲人了解校長工作。
徐立之作風親民，近日校內特設三個紙板徐立之肖像，供畢業生同校長「合照」，徐立之噚日提供同佢肖像合照秘訣，就係最好以側身角度影，「咁樣影得我瘦啲。」港大下月16號為千禧校園奠基，會請過去五任校長做嘉賓，如此盛事，真係百年一遇。