花旗股市前晚偏軟，噚日港股淡友開市搶攻，不過好友喺結算前早有準備，推高隻滙控（005），加埋新地（016）炒上，恒指好快就扭轉跌勢，最後仲升245點收市，成交大增，睇嚟個市仲有得去。
賣地成績理想，地產股全線向好，內房股亦造好，短炒可以諗吓呢兩瓣。
港鐵C輪20660：港鐵（066）昨收26.90元，升0.37%。柯士甸站上蓋物業招標反應熱烈，投標價應該會幾好，噚日股價大成交推上，短線有機試28.50至30元，可以諗吓隻C輪20660。
隻輪現價17.5仙，2010年12月2日到期，行使價30元，溢價18%，引伸波幅32.2%，有效槓桿5.9倍，正股見30元，20660睇31.8仙，正股跌穿25.80元，就沽咗隻輪止蝕。
俊樺