社工陳對推動社會服務非常熱心，負責開拓社會福利服務及社區教育工作。呢日又來電郵告知，三月七日為「世界青光眼日──香港站」日，希望各界注意青光眼呢回事，因為好多人不知青光眼為何物。
社工陳附上一啲小資料，係中文大學眼科做嘅，於○八/○九年間調查三百二十三名青光眼患者，發覺66%唔知道青光眼是甚麼，46.7%不明白慢性青光與急性青光之分別，24.8%不知道青光眼如果缺乏適當控制便可能演變成無可逆轉的失明，66%患者看不清巴士路線號碼，62%患者由於視力欠佳，感到過馬路不安全。
青光眼第一個表徵係眼壓高，驗眼時可以驗到眼壓，可以量度，一啲眼科醫生睇到眼壓去到十六或十七，就要患者每晚滴眼藥水，但亦有眼科醫生講，眼壓去到二十先至係踩線。眼壓高就會影響視野範圍，唔理嘅話就會形成青光眼，好難搞。
社工陳係想大家知多啲「世界青光眼日──香港站」日，請大家留意三月七日之活動。唔好以為青光眼係年紀大嘅長者先會有，青壯年人亦要注意，一位驗光師就同左丁山講過：「香港人好奇怪，成日講健康，要減肥，每年有體檢、有牙檢，但好少人做眼檢，只係配眼鏡之時先至去驗眼，都係睇吓有幾多度近視啫，其實每年接受一次全面眼睛檢查係好重要嘅，掛住檢查心臟，及時通波仔，固然可以挽回生命，但如果唔檢查對眼，睇唔到嘢之時，你估唔慘情咩！」
全面檢查對眼，可向眼科醫生問意見。大學之中，中文大學眼科在亞皆老街香港眼科醫院有先進設備檢測及眼睛掃描儀器，理工大學在紅磡校園及灣仔合和中心有驗眼中心，提供全面服務，不過聽講日日有爆棚之盛。
到目前為止，西醫治療青光眼主要靠滴眼藥水控制眼壓，中醫就配中藥，但因係長期病患，要好有耐性食藥。中大眼科在眼科醫院就引入內地針灸專家為患者（高眼壓）針灸，研究針灸對此病有無治療作用。