「電影，必須有本地色彩。」剛憑電影《歲月神偷》揚威第60屆柏林影展的導演羅啟銳和監製張婉婷，昨日凱旋返港舉行祝捷記者會，羅啟銳在會上有感而發，稱拍攝《歲》片源自一個心結──拍攝一齣完全屬於香港人的電影。就是這番熱誠及愛港情懷，向國際證明了港片不死。
由張婉婷監製、羅啟銳導演的《歲月神偷》，剛在第60屆柏林影展的新世代競賽大獎中，勇奪最佳電影水晶熊獎，成為首部獲此殊榮的港產片。張婉婷和羅啟銳昨早由德國凱旋返港，隨即聯同任達華、吳君如、o靚模蔡穎恩（Evelyn）及童星鍾紹圖等台前幕後工作人員，在機場舉行祝捷會，慶祝電影揚威海外。
「最重要係搵到感情」
籌拍10年、集資艱巨的《歲》片，劇情講述一個60年代鞋匠的故事，也是一齣結集港人集體回憶的電影。自從更緊密經貿關係安排協議（CEPA）03年達成以來，合拍片成為大勢所趨，像《歲》片這類完全屬於香港人的電影已買少見少。
無奈合拍片為滿足內地檢制，嚴重喪失本土色彩及創作元素，有些電影為迎合內地觀眾口味，劇情更弄致不倫不類。正因如此，令羅啟銳更堅定開拍《歲月神偷》的念頭，希望透過電影感動港人，他昨日在記者會上有感而發地說：「電影必須要有本地色彩、本地特色，唔可以話好似家大部份想拍大陸片，然後就突然間唔再拍香港片咁，我覺得唔應該咁。」
羅啟銳續說：「正如我如果要睇一部法國片，我係希望睇到一部真真正正有法國風味嘅電影，而唔係見到法國人拍到好似一間香港茶餐廳咁嘅電影。最重要係搵到感情，搵到價值觀，搵到人與人之間嘅關係，係全世界人都有共鳴。」今次《歲月神偷》揚威海外，無疑是為香港電影打了一支強心針。
除了愛港情懷，近年香港人遇到的種種社會問題，也驅使羅啟銳再次執起導筒，他說：「其實故事大部份都係童年經歷，細細個家庭發生嘅喜怒哀樂事。呢個劇本可以講係我幾十年前已經開始寫（日記形式），但攞呢個故事做電影嘅衝動，唔知點解呢幾年越來越犀利，可能係因為好多80後嘅問題、大家嘅迷惘、社會上又見到好多負能量。咁我好奇怪，我細個時候遇到嘅困難唔係比呢啲更大？我哋60年代長大嘅人真係冇怨言。」
張婉婷則表示電影苦等多年才得到大地娛樂、天下影畫和香港電影發展基金合資開拍，總成本1,200萬，而且主角片酬更是收取友情價，她說：「有幕戲本來想喺永利街搭個雲吞麪檔，君如、華哥一齊食麪，因為冇錢，最後變成一個車仔檔食缽仔糕。」其後張婉婷又笑言他們沒超支，還用剩萬餘元，她笑說：「上次因為太窮冇食到飯，可能今次有得食。」
吳君如自願減片酬
此外，任達華和吳君如昨日異口同聲指欣賞張婉婷及羅啟銳，因而接下這部戲，任達華說：「導演叫我拍呢部戲，傾咗5分鐘偈就OK咗。佢好有誠意，好耐之前已經想同佢哋兩個合作，今年第一份禮物，反而係外國人送畀我哋嘅大利是，希望4月電影金像獎可以一齊得獎。」君如則說：「我接拍呢部戲唔係友情價，應該話係親戚價至真，今次最大得着係首次同佢哋兩個合作，雖然我拍咗好多年電影，但好少有咁敬畏嘅心，導演嘅要求好高，好大壓力。」
採訪、攝影：魯萍、陳志嵐
導演熱話：遷就內地玩死港片
羅啟銳香港人拍香港情，結果《歲月神偷》揚威國際，在柏林影展勇奪最佳電影水晶熊獎。昨日羅啟銳有感而發，呼籲香港電影人不要為了票房只顧拍合拍片，不少一直默默耕耘的幕後人均深有同感。
陳慶嘉：香港絕對有呢個情況，因為要遷就市場，呢個亦都係香港電影當年嘅死因，只不過當年係要就台灣，今日係就內地。其實荷李活電影吸引嘅地方，係荷李活吖嘛，佢唔會就你去拍套港式荷李活片，電影係要有佢嘅個性至吸引到觀眾。
陳果：我一直好堅持拍有香港特色嘅電影，但隨住投資港片老闆越來越少，我哋作為導演嘅都冇得選擇，不過如果遇到一啲題材，成本唔太貴，我都希望可以拍番有香港特色嘅電影，家香港電影經營環境真係好難，我哋做導演嘅唔可能唔睇內地咁大個市場嘅！
彭浩翔：當然事件唔可以一刀切，不過就真係唔好夾硬嚟，因為有啲合拍（片）都好突兀，例如一個香港警察同上司講嘢，個上司居然講國語會好奇怪。合拍可以搞，但要注意文化差異，唔好夾硬。
《音樂人生》導演張經緯：我一向都係做我自己想拍同寫嘅電影，之前編嘅《天水圍的夜與霧》，家籌備執導嘅《一國雙城》講嘅居港權，都係好地道嘅故事，香港人會更有投入感。
娛樂資料庫：四不像電影
隨着內地電影巿場不斷發展，吸引更多香港電影公司開拍羅啟銳口中的四不像電影，以討好內地觀眾，下列幾齣電影便是近年的明顯例子。
《殺人犯》：郭富城在片中作為香港警察，他與上司交談時居然可以你有你說普通話，我有我講廣東話，但周遭人群依然覺得理所當然。
《家有囍事2009》〈圖〉：電影為遷就內地市場需要，中段在毫無理由及必要下，加入一名內地演員，並將故事移師內地發展，令香港觀眾摸不着頭腦。
《保持通話》：滿口普通話的劉燁等一幫人以國際刑警身份在香港出現，身為玩具設計師的徐熙媛全片也未說過一句廣東話，但男主角張家輝及古天樂完全覺得理所當然。
資料來源：《蘋果》資料室
