仲有3個多月,南非世界盃決賽周就開波,而各路大軍亦已經揀好到時嘅訓練基地,而英格蘭領隊卡比路預計周一亦抵達英軍屆時進駐嘅巴富剛(Bafokeng)大本營(圖),視察環境。不過,有英國傳媒就率先披露呢個訓練營,到家仍然係爛地一塊,無論係練習球場、位於上址嘅五星級酒店等設備都仍然未起好,相信卡比路見到之後一定頭痕。依照英格蘭今次世盃計劃,大軍會喺6月3日抵埗,所以巴富剛訓練營目前只有近100日進行施工,而當地工人都話如果能夠及時竣工,英軍就認真好彩,咁都得!