俾人踩住嘅唔止係人，仲有地毯。有人會覺得對地毯要求唔使咁高，更何況今日講嘅車廂地毯，襟污糟又啱位，夠晒。不過有無諗過，踩都可以踩得趣味過人？其實地毯都可以玩花臣，浮誇、可愛乜都有。如果有日有車主要你除鞋上車，免踩花地毯，咪大驚小怪。
記者：趙慧敏
攝影：陳陶鈞
Model：Cherry@PureModels
華麗演繹
車廂地毯要講究，最緊要人無我有，款式當然要夠潮，顏色最好就要襯晒架車，咁多要求，去邊度搵？一般汽車用品店當然滿足唔到你，要搵，呢個世界咁大，上網訂好未？家就有公司專替車主訂購日本車廂潮物，據公司負責人講，日本車界近呢幾年開始玩埋地毯，每個品牌都有其獨特設計及特別質料，因應不同人士需要。好似咕地毯就最搞鬼，最好用嚟襯番架潮車。另外近年興起嘅水晶，唔止可以黐喺車身，又或者裝飾車櫳，連地毯都有埋水晶，不過就要DIY一下，訂套地毯水晶粒返嚟，要自己逐粒逐粒黐上去，咁夠潮未？不過老實講，呢啲地毯擺到明賣相行先，真係令人唔多捨得踩，上車乘客可能要先除鞋，咁搞嘢，你有無興趣試？
大熱格仔
最近麻質嘅格仔地毯真係好爆，幾乎間間汽車用品店都見到佢蹤影，其實當中抄款都唔少，講老祖宗要數日本地毯名牌Karo，標榜用高級麻料織製而成，顏色大多是黑白、紅黑、藍黑格仔等。設計方面為咗避免行駛時地毯移位，每張地毯配有扣位，扣住地台，真係夠晒細心。當然，平平哋選內地製格仔地毯，都可收搶眼之效。
圖案公仔搶鏡
如果傳統啲，想襟污糟，揀番黑色地毯都有好多選擇，雖然黑麻麻，但靠圖案搶鏡一樣得，部份款式更加係限量生產，都咪話唔矜貴。日本汽車用品品牌Mooneyes嘅地毯就以圖案奪目見稱，絕對有本事令內櫳生色不少。另外有無諗過心愛嘅卡通人物都可以助你粉飾，好似HelloKitty，就永遠有捧場客。
訂做合晒身
有人講究賣相，有人最緊要係「合身」，要Fit到漏，非「度身」訂做莫屬，款式雖然都係大同小異，不過尺寸形狀就Fit晒你部車，而地毯覆蓋整個地台嘅價錢由一般私家車$1,280至七人車$4,500不等，視車款而定。（b）
a.日本仁 http://www.jpy.com.hk
b.御馬汽車用品（27708966）
c.金輪汽車用品（27704799）
d.運通汽車音響防盜（27708331）