昨日拍出嘅將軍澳地皮，麪粉價4628蚊呎，同區二手麪包都係咁上下，按發展商預期，兩年後起好預計要賣成六七千蚊呎，元朗五千幾蚊呎睇落即時變得好抵。投得地皮嘅新鴻基地產（016），出咁高價係因為有相連地，除咗協同效應，亦可拉低整體發展成本。
上咗車嘅自然開心，因為連大摩都幫口話YOHOMidtown賣出900伙，內地客唔夠1%，反映係由本地需求帶動，唔存在內地資金炒高樓市。報告咁啱喺賣地日發表，反而令我有另一個看法──內地人對新界非豪宅類用家盤無興趣，一來唔夠貴唔啱身份，二來呢類樓冇水位炒。反映代理一直話內地客落叠投資、移民定居買新界樓等宣傳伎倆，不攻自破。
從元朗盤熱賣，貴過將軍澳二手樓，大摩報告講出一個共通點，就係本地資金已空群而出接棒。無論有無能力買樓，或供樓有幾辛苦，喺發展商、銀行同按揭證券公司攜手力推下，基本上唔係太多人買唔起樓。樓市直升機香港人喺97都經歷過，升升吓變成一股無形壓力，將「無理價」變成「合理價」，好多冇殼蝸牛頂唔順要追價跳上車。
供樓要計埋加息
就喺全城大合唱同業主聯手加租後，購買力得以釋放，後果係乜？係政府若唔做嘢壓樓價，樓市將升得更不理性，到一發不可收拾時，政府突然話要管，情況就有如當年「八萬五」同近年內地樓市一樣，一石擊起千層浪，樓價應聲下跌的話，政府就兩面不是人。照計有前科，政府應該唔會再咁失策，現時急需解決兩個社會矛盾：一係未上車一族民怨將會升溫；二係有財有勢嘅發展商同中產一族擔心政府出怪招。
心急上車嘅「用家」認為追價買樓，按足九成半供得起就冇問題，仲可以邊住邊等升值，怕??家唔上車呢世都買唔起。呢種心魔要戒，怕蝕底唔係買樓理由，要計埋喺加息環境下供唔供得起，每月唔見七成人工，為嚿磚頭死慳死抵，係咪你人生目標先？諗清諗楚至買，樓價跌都頂得住，生活一樣開心至好前進前進前進進。
胡孟青