花旗股市上禮拜五靠穩，港股好友噚日大舉反攻，由於拍地成績理想，恒指並無出現急升急回的情況，最終以20377收市，上升483點。
新地（016）投得將軍澳地皮，成交價為市場預期上限，對港股同樓市的後市都有支持作用，過兩日就係期指結算，話唔定地產股就係好友踢上嘅工具。
滙控C輪21155：滙控（005）昨收83.65元，升3.2%。下禮拜一公佈業績，股價噚日突破20日線，業績公佈前後有機升上88.50元，可以諗吓隻C輪21155。
隻輪現價44.5仙，2010年8月23日到期，行使價88.88元，溢價11.5%，引伸波幅31.2%，有效槓桿7.3倍，正股見88.50元，21155睇66仙，正股跌穿81元，就沽咗隻輪止蝕。
俊樺