德甲波雖然喺4大聯賽中比較少香港球迷留意,但絕對唔代表唔好睇,周日場雲達不來梅對利華古遜,就爆笑之餘,又緊張刺激,好睇過賀歲片。利華乘住拜仁慕尼黑上周六失分,一心諗住贏波拋離佢,戴迪約克率先開紀錄,但門將艾達唔生性,一個肉酸屙蛋(圖),俾對手前鋒比沙路執雞,雙方半場打成1:1。上半場笑完,下半場就緊張,利華憑卻奧斯射入世界波再度領先,不過補時階段,不來梅中堅梅迪薩卡頭槌追成2:2平手,戲劇性追平。痛失兩分嘅利華,就失去擴大領先機會,仍然同拜仁同得49分,只以多一個入球暫列榜首。