等足5年終於「家有囍事」，我哋嘅「喜劇之王」周星馳，終於響噚日「升呢」做上市公司話事人！帝通國際（8220）噚晚宣佈，委任周生做執行董事，睇怕要由星爺改口做周董！初步訂嘅委任年期係5年。周董負責拓展影視娛樂製作同埋相關業務。
帝通獲《長江7號》特許權
此外，帝通仲得到佢嘔心瀝血個套《長江7號》的全球獨家知識產權特許權，即係可以響全球授權、生產、製造、銷售套戲嘅周邊產品，兼夾用10蚊同周董買起一間叫Raxco的網絡遊戲公司，呢間公司正拍住網龍（777）搞緊「長江7號」網遊。
查實周董一直部署做上市公司老闆，05年曾經試過將佢間品記申請上市但被拒絕，之後睇準帝通大股東彭華俾新加坡政府查緊急於套現，於是就拍住菱電將尖沙嘴個GI商場唧入去，三兩下手勢就做咗上市公司大股東，反映到周董有「算死草」嘅數口，絕對唔係無厘頭！
仲有帝通將會改名比高集團，唔知同周董揸住嘅山頂經典豪宅天比高有冇關係呢？
華華仲記得5年前響銅鑼灣SOGOrebrand個日，同周董有過一面之緣，佢仲承諾過第日佢公司上市嗰陣，一定會搵華華坐低食個包、飲杯茶做個獨家訪問，唔知周董會唔會履行呢個諾言呢？
李華華