「滔滔千里淹天地，痛惜蒼生不幸，筋竭力疲……」以前中國發生重大水災，香港人都本住血濃於水嘅熱心，大搞籌款行動。雖然葡萄牙翼鋒基斯坦奴朗拿度（C朗）離開祖家馬德拉群島（MadeiraIsland）多年，到英格蘭同西班牙搵食，但佢一啲都冇忘本；周日皇馬對維拉利爾嘅西甲比賽，C朗射入一球後，即時展示寫上「MADEIRA」嘅T恤，就係關心祖家水災嘅行動。
1入球3助攻為皇馬大炒
C朗生出地、葡萄牙西南部嘅馬德拉群島，上周六因為暴雨成災，造成40多人不幸身亡，過百人受傷，而且亦有好多人家園盡毀；C朗在得悉事件後，賽前已經表明會盡自己能力範圍幫助災民。
正所謂好心有好報，C朗喺比賽先靠一個急勁罰球，幫皇馬先開紀錄，之後更交出3次助攻，最終由卡卡同希古恩梅開二度；到87分鐘，C朗博到12碼，不過佢就好大方咁讓畀沙比阿朗素射，結果沙比仔成功埋齋，6:2大破先後有辛拿及尼爾馬建功嘅維拉利爾，一洗上場歐聯作客輸畀里昂之恥，仲追到只落後巴塞隆拿兩分，仍列西甲次席。
答允出席波圖籌款賽
雖然贏波，不過C朗賽後仍然好傷心咁講：「呢度係我成長，亦係我家人居住嘅地方，我簡直不相信電視前嘅情景。」當然C朗唔會齋講而冇行動，葡萄牙勁旅波圖已準備搞籌款賽，希望國內外足球巨星有錢出錢，有力出力，雖然比賽時間同地點都未確定，不過C朗已經答應參加。講個人私生活，C朗就唔多檢點，但從今次事件，就證明佢都係有血性有同情心嘅巨星，總好過盛傳四川大地震中，涉及「詐捐」嘅中國當紅女影星咁啦！